Pavlodar oblysynda ruqsat etilmegen jerge qoqys tastalǵany úshin 12 ákim jazalandy

PAVLODAR. KAZINFORM – Ekologterdiń aıtýynsha, monıtorıng barysynda óńirde 250-ge jýyq ruqsat etilmegen qoqys oryndary anyqtalǵan.

Pavlodar oblysynyń Ekologııa departamenti monıtorıng «Qazaqstan Ǵarysh Sapary» UK» AQ geoportalynyń derekterin paıdalana otyryp, sondaı-aq jergilikti atqarýshy organdar usynatyn aqparat negizinde júrgiziletinin málimdedi.

Nátıjesinde 248 stıhııalyq polıgon anyqtaldy. Búgingi tańda sarapshylar barlyq qaldyq alynyp tastalǵanyn atap ótti. Biraq qoqys qaıta paıda bolýy múmkin.

- Ekologııalyq zańnamany buzǵany úshin derbes jaýapkershilikti kúsheıtý maqsatynda 2025 jyly aýyldyq okrýgterdiń 12 ákimi ákimshilik jaýapkershilikke tartyldy. Aıyppuldyń jalpy somasy 350 myń teńgeden asty, - dep habarlady Pavlodar oblysynyń Ekologııa departamenti.

Júıeli baqylaý úshin turaqty reıd júrgizilip, anyqtalǵan faktiler týraly aqparat halyqqa ashyq bolýy úshin áleýmettik jelilerde jarııalanady. Ákimdiktermen jáne polıtsııa organdarymen ózara is-qımyl jolǵa qoıylǵan.

Aıta keteıik, álemniń kóptegen elinde turmystyq qatty qaldyqtardy qaıta paıdaǵa jaratý úırenshikti úrdis. Keı memleketter tipti bul salany paıda kózine aınaldyrǵan.

Al Ekologııa jáne tabıǵı resýrstar vıtse-mınıstri Mansur Oshýrbaevtyń aıtýynsha, Qazaqstanda turmystyq qoqystyń 25%-y qaıta óńdeledi.