Pavlodar oblysynda rekordtyq astyq jınaldy

PAVLODAR. KAZINFORM - Pavlodar oblysynyń dıqandary astyqty dándi daqyldar boıynsha bıyl taǵy rekordtyq ónimge qol jetkizdi. Óńirde 1 mln 116 myń tonna astyq qambalarǵa quıylyp jatyr.

Pavlodar oblysynyń egis dalalarynda qazirgi ýaqytta maıly daqyldan ózge daqyldardyń barlyǵy jınaldy. Fermerler úshin jıyn-terim naýqany tabysty ótip, rekordtyq ónimder alyndy.

Óńirlik aýyl sharýashylyǵy basqarmasynyń bólim basshysy Esentaı Múrsálimovtiń dereginshe, bıyl oblystaǵy egis alqaptarynyń jalpy aýmaǵy 1 mln 406,2 myń gektar boldy. Bul ótken jylmen salystyrǵanda 165,5 myń gektarǵa kóp.

- Aýyl sharýashylyǵy taýarlaryn óndirýshilerimiz jıyn-terim nátıjesinde 1 mln 116 myń tonna astyq jınaǵany málim boldy. Sońǵy ret bizdiń óńirde 2022 jyly 1 mln 25 myń tonna astyq alynǵan edi. Sondyqtan bıylǵy kórsetkish rekordtyq ónim bolyp otyr. Dándi daqyldar boıynsha barlyq ónimniń 289,5 myń tonnasyn nemese 26 paıyzyn Ertis aýdany berip otyr. Jalpy bul aýdandaǵy astyq ónimdiligi bıyl asa berekeli boldy. Oblysta astyqtyń ortasha ónimdiligi 12 tsentnerdi qurasa, Ertiste 12,7 boldy. Al arpa, tary, qaraqumyq boıynsha da olar alǵa ozdy, - deıdi Esentaı Múrsálimov.

Bıyl oblysta 769 myń tonna kartop jınalǵan. Ortasha ónimdilik – gektarynan 310 tsentner.

Buǵan deıin Pavlodardyń egis alqaptaryndaǵy astyqtyń ónimdiligi byltyrǵydan úsh ese joǵary ekenin jazǵanbyz.