Pavlodar oblysynda polıtseıler jolda qalǵan 2 myńǵa jýyq avtokólikti alyp júrdi

ASTANA. KAZINFORM – Pavlodar oblysynda qolaısyz aýa raıy kezinde polıtseıler 2 myń avtokólikti qaýipsiz kolonnamen júrgizdi. 

Polisia.kz-tiń málimetinshe, keıingi táýlikte oblystyń avtojoldarynda aýa raıynyń kúrt nasharlaýy jáne kóriný qashyqtyǵynyń nólge deıin tómendeýinen kólikterdiń barlyq túri úshin qozǵalys ýaqytsha toqtatyldy.

Búgin tańerteńnen bastap polıtseıler 860 júk kóligin, 865 jeńil avtokólikti jáne 13 avtobýsty qaýipsiz kolonnamen júrgizdi. Júrgizýshilerge uıymdasqan qozǵalys tártibi, belgilengen jyldamdyq rejımin saqtaý jáne qaýipsiz araqashyqtyqty ustaný qajettigi túsindirildi. Pavlodar oblysy PD patrýldik polıtsııa rotasynyń komandıri Aset Ryspaevtyń aıtýynsha, polıtsııa qyzmetkerleri tómen temperatýra, qar jáne boran kezinde táýlik boıy jumys istep, jol-kólik oqıǵalarynyń aldyn alý jáne azamattardyń qaýipsizdigin qamtamasyz etýge baǵyttalǵan sharalardy júzege asyryp jatyr. Qolaısyz aýa raıynda jolda qalǵan azamattar úılerine jetkizildi.

Aýa raıy men jol jaǵdaıynyń kúrt nasharlaýyna baılanysty Pavlodar oblysymen shektesetin óńirlerde avtojoldardy bir ýaqytta jabý týraly sheshim qabyldandy. Polıtseıler jolaýshylar tasymaldaıtyn kólik júrgizýshilerin jáne qalaaralyq tasjoldarǵa shyǵatyn azamattardy saq bolýǵa shaqyrady.

Júrgizýshilerge jyldamdyqty belgilengen deńgeıde ustaý, qaýipsiz araqashyqtyqty saqtaý, manevr jasaý erejelerin qatań oryndaý, sondaı-aq aýa raıynyń ózgeristerin baqylap, joldar jabylǵan jaǵdaıda saparǵa shyqpaý usynylady. 

Eske sala keteıik, buǵan deıin 13 naýryzda eldegi qaı joldarda qozǵalys shektelgenin jazǵan edik.