Pavlodar oblysynda polıtseı ákimshilik isti ózgertkeni úshin jazalandy
ASTANA. KAZINFORM — Aqsý qalasynda polıtseı para alyp, ákimshilik istegi dálelderdi burmalaǵany úshin sottaldy. Ol kólik júrgizý quqyǵy joq ári mas kúıinde jol apatyn jasaǵan áıeldiń ákimshilik qamaqtan qutylýyna kómektesken.
Pavlodar oblysy prokýratýrasynyń málimetinshe, áıelge qatysty ákimshilik is qaralǵan kezde sotqa onyń júkti ekeni týraly medıtsınalyq anyqtama usynylǵan. Osy qujat negizinde ákimshilik qamaq jazasy aıyppulǵa aýystyrylǵan.
Alaıda keıin júrgizilgen tekserý barysynda júktilik týraly anyqtamanyń jalǵan ekeni anyqtalǵan.
— Tergeý nátıjesinde polıtsııa qyzmetkeriniń para alǵany jáne ákimshilik is boıynsha dáleldemelerdi burmalaǵany dáleldendi. Sot ony kináli dep tanyp, 6,6 mln teńge kóleminde aıyppul saldy. Sondaı-aq ol ómir boıyna memlekettik qyzmette jáne ózge de laýazymdarda jumys isteý quqyǵynan aıyryldy, — delingen habarlamada.
Budan bólek, sottalǵan qyzmetker arnaıy ataǵynan aıyrylyp, para retinde alǵan aqshasy memleket kirisine tárkilendi.
Sot Pavlodar oblysy prokýratýrasy qyzmetkerleriniń jumysyna oń baǵa berip, jeke qaýly shyǵardy.
Úkim ázirge zańdy kúshine engen joq.
Eske salaıyq, buǵan deıin Astanada jalǵan qujatpen 18 talapkerdi aldaǵan adam sottaldy.
