Pavlodar oblysynda otyndyq aǵash qansha turady
PAVLODAR. KAZINFORM — Búginde otyndyq aǵashty satýmen birneshe orman ıelenýshi uıym aınalysady. Eń qymbat otyndyq aǵash Baıanaýyl ulttyq parkiniń aýmaǵynda tirkeldi.
Pavlodar oblystyq orman sharýashylyǵy jáne janýarlar dúnıesi ınspektsııasynyń málimetinshe, 2026 jylǵa 38,8 myń tekshe metr aǵash daıyndaý josparlanǵan. Onyń 35%-yn turǵyndar qańtar-aqpan aılarynda satyp alyp qoıǵan. Qazir aldaǵy qysqy maýsymǵa daıyndyq jumystary bastaldy.
Memlekettik orman qory aýmaǵynan turǵyndardyń tıisti rásimdeýsiz óz betinshe otyn jınaýyna tyıym salynǵan. Qoldanystaǵy tártipke sáıkes, turǵyndar áýeli orman ıelenýshi uıymǵa júginip, aqysyn tólegennen keıin ǵana aǵash ala alady.
— Ormanshylar aǵashty tıep beredi, sodan keıin mindetti túrde tańba basady. Bul onyń zańdy túrde alynǵanyn baqylaýǵa múmkindik beredi. Inspektsııa qadaǵalaýshy organ retinde kólikti toqtatyp, ruqsat qujattarynyń bar-joǵyn teksere alady. Qujattar men tańba bolmasa, turǵyn aǵashty óz betinshe daıyndap, zań buzdy dep qabyldanady, — deıdi ınspektsııanyń orman sharýashylyǵy jáne janýarlar dúnıesi bóliminiń bas mamany Almıra Jıngýlova.
Aǵash satyp alý tártibi ár mekemede ártúrli. Baıanaýyl ulttyq parkinde jáne «Ertis ormany» rezervatynyń aýmaǵynda otyndyq aǵashty mekeme qyzmetkerleri ózderi kesip, daıyn otyn túrinde satady. Sondyqtan mundaǵy baǵa da joǵary: bir tekshe metri Baıanaýylda 5300 teńge tursa, Ertis ormany aýmaǵynda — 4000 teńge.
Al Pavlodar, Maksım-Gorkıı jáne Úrlitúp orman sharýashylyǵy mekemelerinde aǵashtyń belgilengen baǵasy — 3000 teńge. Deıturǵanmen bul jerlerde turǵyndar otyndy ormanshynyń qatysýymen ózderi daıyndaýy kerek. Talapqa sáıkes, bir otbasyna orta eseppen 5 tekshe metr aǵash qarastyrylǵan. Aýyldyq jerlerde otyn negizinen pesh jaǵý úshin paıdalanylsa, qalalarda monsha jaǵýǵa jumsalady.
Buǵan deıin Pavlodarda kómirdiń kenishten bosatý baǵasy ózgergenin, turǵyndar burynǵyǵa qaraǵanda kóp tóleıtinin jazǵanbyz.
