Pavlodar oblysynda órtengen jerlerdiń kólemi 8,5 ese ulǵaıǵan
PAVLODAR. KAZINFORM — Ertis-Baıan óńirinde bıyl ormandy-dalaly jerlerde 928,7 gektar aýmaq otqa oranǵan. Keltirilgen materıaldyq shyǵyn 19 mln teńgeden asty.
Oblystyq tótenshe jaǵdaılar departamentiniń málimetinshe, bıyl óńirde barlyǵy 135 orman órti tirkelgen. Bul ótken jylmen salystyrǵanda 36,6 paıyzǵa az. Alaıda órt sanynyń tómendeýine qaramastan, ot sharpyǵan aýmaq kólemi aıtarlyqtaı ulǵaıǵan. Byltyrǵy kórsetkishpen salystyrǵanda 8,5 ese ósip, 928,7 gektarǵa jetti. Al materıaldyq shyǵyn kólemi ótken jylmen salystyrǵanda úsh ese artyp, 19 mln teńgeden asty.
— Órt oqıǵalarynyń basym bóligi erekshe qorǵalatyn tabıǵı aýmaqtarda boldy. Atap aıtqanda, 98 jaǵdaı nemese jalpy órttiń 73 paıyzy «Ertis ormany» memlekettik orman tabıǵı rezervaty men Baıanaýyl memlekettik ulttyq tabıǵı parkiniń aýmaǵynda tirkeldi. Al jergilikti atqarýshy organdardyń qaramaǵyndaǵy ormandarda 37 órt oqıǵasy bolǵan, — deıdi Pavlodar oblysy tótenshe jaǵdaılar departamenti bastyǵynyń orynbasary Qaırat Shaımardenov.
Mamandardyń aıtýynsha, órttiń negizgi sebepteri –naızaǵaıdyń túsýi men adamı faktory. Naızaǵaı túsý saldarynan 104 órt shyqqan. Bul jalpy oqıǵalardyń — 78 paıyzy.
Eske sala keteıik, ShQO-da peshti paıdalaný erejeleriniń buzylýynan 20-dan asa úıde órt shyqty.