Pavlodar oblysynda orman tálimbaqtary jetispeıdi

PAVLODAR. KAZINFORM – Pavlodar oblysynda bıyl 7,8 mıllıon aǵash otyrǵyzý josparlanǵan. Onyń biraz bóligin syrttan satyp alý kózdelip otyr.

Ertis-Baıan óńirindegi memlekettik orman qory – 478,7 myń gektar. Onyń 312,1 myń gektary ormanmen kómkerilgen.

Orman sharýashylyǵy salasynda oblys ákimdigine qarasty úsh orman qorǵaý mekemesi jumys isteıdi. Sonymen qatar óńirde eki respýblıkalyq tabıǵat qorǵaý mekemesi bar: «Ertis ormany» rezervaty jáne Baıanaýyl memlekettik ulttyq tabıǵı parki.

– Óńir ormandarynda negizinen qaraǵaı, qaıyń, kókterek, terek, tal jáne jóke aǵashtary keń taralǵan. Ásirese Ertis boıyndaǵy qaraǵaıly alqaptar aımaqtyń tabıǵı baılyǵy sanalady. Qazirgi tańda tabıǵat qorǵaý mekemelerinde tórt tálimbaq jumys isteıdi. Onyń úsheýi «Ertis ormany» aýmaǵynda, bireýi Baıanaýyl ulttyq parkinde ornalasqan. Alaıda olar oblystyń kóshetterge degen jyldyq suranysyn tolyq qamtamasyz ete almaıdy. Sondyqtan qajetti kóshetter syrttan satyp alý jáne ýaqytsha tálimbaqtar uıymdastyrý arqyly qamtamasyz etiledi, - deıdi Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasynyń basshysy Saǵyn Tóleýtaev.

Mamandardyń aıtýynsha, bıyl jalpy aýmaǵy 1250 gektar jerge 7,8 mıllıon kóshet otyrǵyzý kózdelgen. Onyń basym bóligi – qylqan japyraqty qaraǵaı men qatty aǵash tuqymdas qaraǵash. Qazirgi ýaqytta kóktemgi orman otyrǵyzý naýqanyna daıyndyq júrip jatyr. Tıisti konkýrstyq rásimder ótkizilip, otyrǵyzý materıaly daıyndalyp jatyr. 

– Memleket basshysynyń tapsyrmasy men ormandardy molyqtyrý boıynsha bekitilgen keshendi jospar sheńberinde 2021 jyldan bastap memlekettik orman qory aıtarlyqtaı ulǵaıyp keledi. Tek byltyr aımaqta 1150 myń gektar alqapqa qylqan japyraqty jáne japyraqty tuqymdylardyń 6,5 mln kósheti otyrǵyzylǵan, - dep qosty S.Tóleýtaev.

Ormandardy saqtaý tek aǵash otyrǵyzýmen shektelmeıdi. Aýrýǵa shaldyqqan, zaqymdanǵan nemese qýraǵan aǵashtardy ýaqtyly anyqtap, sanıtarlyq kesý jumystaryn júrgizý – ormannyń ekologııalyq tepe-teńdigin saqtaýdyń mańyzdy bóligi. Oblysta iriktep jáne jappaı sanıtarlyq kesý jumystary turaqty túrde júrgiziledi.

Mamandar orman órtteri men zańsyz aǵash kesý derekteri negizgi másele bolyp otyrǵanyn aıtady. Ásirese qurǵaqshylyq jyldary órt qaýpi kúsheıedi. Osyǵan baılanysty aldyn alý sharalary kúsheıtilgen. Sońǵy jyldary orman sharýashylyqtarynyń materıaldyq-tehnıkalyq bazasy da edáýir nyǵaıǵan. 2022–2025 jyldary 5 órt avtotsısternasy, 8 traktor, 10 shaǵyn órt kesheni, 33 mototsıkl jáne ózge de arnaıy tehnıka satyp alynǵan. Bıyl taǵy 47 tehnıka alý josparlanyp otyr. Sonymen qatar 2022 jyldan bastap orman sharýashylyǵy mamandarynyń jalaqysy kezeń-kezeńimen ósirilip keledi. Bul – saladaǵy kadr tapshylyǵyn azaıtýǵa jáne mamandardy ustap qalýǵa baǵyttalǵan shara.

Eske sala keteıik, Qyzylordadaǵy orman alqabyn 83% sekseýil alyp jatyr.