Pavlodar oblysynda onlaın-kazınony jarnamalaıtyn 700-den astam saıt buǵattaldy
PAVLODAR. KAZINFORM - Sońǵy eki jylda óńirlik ekonomıkalyq tergep-tekserý departamentiniń mamandary oıyn bıznesi men lotereıalardy retteý salasynda 12 ákimshilik is qozǵaǵan.
Pavlodar oblysy boıynsha ekonomıkalyq tergep-tekserý departamenti basshysynyń orynbasary Ǵalıasqar Qasymovtyń dereginshe, 2024 jyldan beri óńirde onlaın-kazınolardy nasıhattap kelgen 700-den astam saıt buǵattalǵan.
- Búgingi tańda zańsyz qumar oıyndarǵa qatysty kez kelgen jarnama túrine, sonyń ishinde áleýmettik jelilerde de tyıym salynǵan. Buǵan deıin zańsyz bıznes uıymdastyrýshylary onlaın-oıyndardy retteýdiń naqty tetikteri bolmaýyn, ıaǵnı zańnamadaǵy olqylyqtardy paıdalanyp, jaýapkershilikten jaltaryp ketetin. 2024 jyly engizilgen jańa túzetýler oıyn qyzmetiniń barlyq aspektilerine baqylaýdy kúsheıte otyryp, bul olqylyqtardy joıdy, - deıdi departament ókili.
Zańsyz oıyn bıznesin uıymdastyrǵany úshin salynatyn aıyppuldar mólsheri eki eseden astam, ıaǵnı 2 myń AEK-ke nemese shamamen 7,9 mıllıon teńgege deıin ulǵaıtyldy. Sondaı-aq zańsyz bızneske qatysatyn uıymdasqan qylmystyq toptar úshin eń joǵary jaza merzimi 7 jylǵa deıin uzartylǵan.
Eske sala keteıik, eldegi uıaly baılanys operatorlary zańsyz oıyn bıznesindegi qarjy aǵyndaryn baqylaýǵa aldy.
