Pavlodar oblysynda onkologııamen aýyratyndar sany azaıyp keledi

PAVLODAR. KAZINFORM — Bıylǵy jeti aıdyń qorytyndysy boıynsha onkologııalyq aýrýshańdyq kórsetkishi 100 myń adamǵa shaqqanda 308,3-ti quraǵan. Bul ótken jyldyń sáıkes kezeńimen salystyrǵanda 0,8%-ǵa tómen.

Uzaq jyldar boıy oblys obyr aýrýlary boıynsha respýblıkada birinshi orynda turǵan edi. Bıyl tórtinshi orynǵa tómendegeni tirkeldi. Óńirde qaýipti aýrýlardy erte dıagnostıkalaý kórsetkishi — 31,0%, ýaqtyly dıagnostıka — 66,8%. Bul Pavlodar oblysyn zamanǵa saı dıagnostıkalaý salasynda birinshi orynǵa shyǵarǵan.

— Onkologııalyq dıspanser óńirdegi jetekshi mamandandyrylǵan mekeme retinde óz pozıtsııasyn nyǵaıtyp, onkologııalyq aýrýlardy dıagnostıkalaý, emdeý jáne aldyn alý salasynda joǵary nátıjeler kórsetip keledi. Byltyr mekeme syrtqy akkredıtatsııalyq komıssııanyń qorytyndysy «JOGARY SANAT» sanatyn aldy. Dıspanserde bir aýysymda 100 adam qabyldaýǵa múmkindik bar. Statsıonarda 205 tósek oryn ornalasqan. 376 qyzmetker jumys isteıdi. Mamandardyń 90%-dan astamy biliktilik sanatyna ıe, — deıdi óńirlik onkologııalyq dıspanserdiń dırektorynyń orynbasary Ásel Asqarova.

Onkodıspanser zamanaýı medıtsınalyq jabdyqtarmen jabdyqtalǵan. Olardyń qatarynda «Revolution EVO» kompıýterlik tomografy, «SIGNA Creator» magnıtti-rezonanstyq tomografy jáne «Varian Medical Systems» KT-sımýlıatory bar jelilik údetkish bar. 2025 jyldyń qańtarynan bastap MRT apparatyna jasandy ıntellekt engizildi. Bul keskin sapasyn arttyryp, patsıentterdi qamtýdy keńeıtýge múmkindik bergen.

Eske sala keteıik, onkologııa aýrýlaryna skrınıng MÁMS júıesi aıasynda tegin kórsetiledi.