Pavlodar oblysynda ónerkásip parki salynady
ASTANA. KAZINFORM – Qazaqstan Premer-mınıstri Oljas Bektenov sıngapýrlyq XINFA GROUP kompanııasynyń basqarma tóraǵasynyń orynbasary Chjao Tınıýnmen Pavlodar oblysynda ónerkásip parkin salý boıynsha daıyndyq jumystarynyń barysyn talqylady. Bul týraly Úkimettiń baspasóz qyzmeti habarlady.
Búgingi tańda Qazaqstanda Prezıdenttiń tapsyrmasy boıynsha ekonomıkany ártaraptandyrýǵa jáne óńdeýshi ónerkásipti qoldaýǵa baǵyttalǵan ınvestıtsııalyq saıasat júzege asyrylyp jatyr.
Kezdesý barysynda jobanyń aǵymdaǵy jaǵdaıyna nazar aýdaryldy.
Chjao Tınıýn qazirgi ýaqytta jer ýchaskesi aıqyndalyp, ınvestıtsııalyq kelisimshart jasalǵanyn, sondaı-aq kompanııa park qurylysyn júzege asyrý úshin jobalaý ınstıtýtyn tartqanyn atap ótti.
QR Premer-mınıstri memlekettik organdarǵa jalpy ınvestıtsııa kólemi $15 mlrd bolatyn iri ınvestıtsııalyq jobany júzege asyrýǵa barynsha járdem kórsetýdi tapsyrdy. Joba óńirdiń jáne tutastaı alǵanda eldiń damýyna mýltıplıkatıvtik áser etedi.
Tolyq tsıkldy ónerkásip parkin qurý jónindegi tujyrymdamada boksıtterdi tereń óńdeý jolymen alıýmınıge aınaldyratyn joǵary ıntegratsııalanǵan óndiris qurý qarastyrylǵan. Alıýmınıı totyǵyn óndiretin kásiporyndardyń qýatyn jylyna 4,8 mln tonna, elektrolıttik alıýmınııdi 2,4 mln tonna deńgeıinde ustap turý josparlanyp otyr.
Tereń óńdeý kólemi jyl saıyn 1,2 mln tonna bolady. Jobany júzege asyrý 10 myń adamdy jumyspen qamtamasyz etýge múmkindik beredi. Óndiristik nysandardyń qurylysy bıyl bastalady. 1-shi kezekti iske qosý 2028 jyly, jobalyq qýatqa shyǵý 2029 jyly júzege asyrylmaq.
Aıta keteıik, bıyl «Qazsýshardyń» tehnıka parki alty jańa kememen tolyǵady.
