Pavlodar oblysynda óndiristik qaldyq óńdemek bolǵan kompanııanyń ústinen tergeý bastaldy

ASTANA. KAZINFORM – Pavlodar oblysynda iri kásiporyndardyń óndiristik qaldyqtaryn óńdeý úshin jer alyp, bıznes júrgizgen kompanııanyń ústinen tergeý bastaldy. Bas prokýrordyń aǵa kómekshisi Ashat Aýqatov Májilistegi dóńgelek ústelde osyndaı málimet aıtty.

«Ónerkásiptik qaldyq polıgondaryna kelsek, bul eń baqylaýsyz jatqan sala deýge bolady. Elde qansha ónerkásip qaldyǵy túzilgenin eshkim bilmeıdi. Olardy qaıta óńdeýge arnalǵan oshaqtar joq. Al isker kásipkerler osydan bıznes jasap otyr. Pavlodar oblysynda seriktestikterdiń biri iri kásiporyndardyń qaldyqtaryn jınaýǵa jer ýchaskesin alǵan. Biraq ónerkásip qaldyqtaryn ashyq alańǵa tógip kelgen», - dedi Bas prokýratýra ókili.

Ashat Aýqatov qazir bul oqıǵa boıynsha sotqa deıingi tergeý bastalǵanyn aıtty.

«100 gektar aýmaqta 116 myń ýly qaldyqtar shashylyp jatyr. Qaldyqty kásiporyndardan shyǵaryp áketkeni úshin kásipker 1,5 mlrd teńge tabys tapty. Al zııandy shań-tozań aınalaǵa tarap, aýa men topyraqty ýlap jatyr. Sotqa deıingi tergeý bastadyq», - dedi Bas prokýrordyń aǵa kómekshisi.

Sondaı-aq, ol Semeı ákimdigi 2,6 mln eýronyń qoqys óńdeý jabdyǵyn jaramsyz qylǵanyn málim etti.