Pavlodar oblysynda oqýshy qyz tapanshamen balanyń kózine oq atqan

ASTANA. KAZINFORM – 5 synyp oqýshysy mektepke oıynshyq tapansha ákelip, ony qurbylaryna kórsetkende abaısyzda oq atqan. Oq 6 synyp oqýshysynyń kózine tıgen. Zardap shekken bala aýrýhanaǵa túsip, qyzdyń ata-anasyna qatysty ákimshilik hattama toltyryldy.

Oqıǵa 1 qazan kúni Pavlodar oblysyndaǵy bilim berý mekemeleriniń birinde bolǵan. Oblystyq bilim basqarmasynyń túsindirýinshe, oqýshy qyz sómkesinen tapansha alyp shyǵyp, ony synyptastaryna kórsetkende, kezdeısoq ótip bara jatqan basqa oqýshyǵa oq atqan.

Pavlodar oblystyq balalar aýrýhanasynyń atap ótýinshe, zardap shekken balaǵa kóz almasynyń zaqymdanýy jáne konıýnktıvanyń sydyrylýy dıagnozy qoıylǵan.

«Baalanyń jaraqaty emdelip jatyr. 1 qazan kúni birinshi sabaqtan keıingi úzilis kezinde 5 synyp oqýshysy ul balanyń kózine oıynshyq myltyqpen abaısyzda oq atqan. 2011 jyly týǵan bala aldymen aýdandyq aýrýhanaǵa jetkizilip, keıin Pavlodar oblystyq aýrýhanasyna jiberildi. Ol saǵat 14:00-de travmatologııa bólimine kelgen», - dedi dárigerler.

Zardap shekken balanyń turǵylyqty jeriniń alys bolǵany eskerile otyryp, ony Pavlodardaǵy dárigerler baqylaýynda qaldyrý uıǵaryldy. Sonymen birge bul oqıǵa polıtseıler nazarynan tys qalǵan joq.

«Zańdy ókilge qatysty tárbıe men bilim berý, quqyqtary men múddelerin qorǵaý, qaýipsizdigin qamtamasyz etý sharalary boıynsha mindetterdi oryndamaý faktisi boıynsha ákimshilik materıal toltyryldy. Mektepte profılaktıkalyq keńes ótti», - dep habarlady Pavlodar oblystyq polıtsııa departamentinen.