Pavlodar oblysynda naýqas áıel men náresteni qutqarý úshin tikushaq qajet boldy

PAVLODAR. KAZINFORM – Medıtsına mamandaryna sanavıatsııa jelisi boıynsha bir kúnde eki shaqyrtý tústi, alaıda, qolda bary tek jalǵyz tikushaq.

Pavlodar oblystyq jedel medıtsınalyq járdem stantsııasynyń ókilderi 77 jastaǵy naýqas áıel men jańa týǵan náresteni 1,5 saǵat aıyrmashylyqpen Pavlodarǵa jetkizgeni týraly aıtyp berdi.

Shaqyrtýdyń ekeýi de 29 tamyz kúni túsken.

Saǵat 12:05-te Jelezın aýdandyq aýrýhanasynan Pavlodarǵa shaqyrtý tústi. Onda 1948 jyly týǵan, ınfarkt alǵan áıeldi jetkizý qajet boldy. Ol úshin kardıoortalyqtyń arnaıy mamandarynyń kómegi kerek edi.

— Biraz ýaqyttan keıin bizge Ekibastuzdan taǵy bir ótinim tústi. Oblys ortalyǵyna shala týǵan sábıdi jetkizý qajet boldy. Balanyń tynysy tarylǵan soń jedel áreket etý kerek boldy, — dedi medıtsınalyq avıatsııa bóliminiń meńgerýshisi Almagúl Besembınova.

Sanavıatsııanyń qaramaǵynda tek bir tikushaq bar, ári ol tek kúndiz ǵana usha alady. Osyǵan baılanysty dárigerler Ulttyq shuǵyl medıtsınalyq járdemdi úılestirý ortalyǵy men «Qazavıaqutqarý» AQ-tan kómek surap, qosymsha MI-8 tikushaǵyn paıdalanýǵa múmkindik aldy. Ótinim túskennen keıin bir saǵat ótpeı-aq dárigerler borty Ekibastuzǵa attandy.

Nátıjesinde ınfarkt alǵan áıel 17:48-de kardıoortalyq mamandaryna tapsyryldy, al jańa týǵan sábı 18:48-de perınataldyq ortalyqqa jetkizildi.

Osyǵan deıin qutqarýshylardyń shuǵyl kómekke muqtaj náresteni Jezqazǵan ortalyǵyna jetkizgeni týraly jazdyq.