Pavlodar oblysynda muz qursaýynan qutqarylǵan aqqýlar aıdynyna oraldy
ASTANA. KAZINFORM – Pavlodar oblysynda qys ortasynda muzǵa jabysyp, aıazda qalǵan qos aqqý óz mekeni Sulýsor kóline qaıta oraldy.
Qos aqqýdyń oqıǵasy qysta bastalǵan bolatyn. Qustardyń biri muzǵa jabysyp qalyp, syńary ony tastamaı janynda júrgen jerinen aýyl turǵyny Baýyrjan Jaqypov taýyp alǵan. Baýyrjan Jaqypov aqqýlardy óz úıine ákelip, olardyń qystap shyǵýyna bar jaǵdaıdy jasady.
Volonterdiń aıtýynsha, qustardy baǵý barysynda qıyndyqtar da bolǵan. Alaıda halyqtyń amanatyn arqalaǵan Baýyrjan qustardy kóktemge deıin aıalap baqty. Ol aqqýlarǵa «Máńgilik mahabbat» degen esim berdi.
Qutqarýshy Baýyrjan Jaqypovtyń aıtýynsha, qustardyń qazirgi jaǵdaıy turaqty.
– Qys boıy aqqýlar 4 jarym aı boıy ózimde boldy. Olarǵa bıdaı, arpa berilip, kádimgi úıdegi qazdar men úırekter sııaqty kútim jasaldy. Aqqýlardy eń birinshi sátte qys boıy ýaıymdadyq. Keıde as jemeı qalǵan nemese aǵashtardyń arasynda qystyrylyp qalǵan kúnderi boldy. Sonyń bárin ýaıymdap, qanshama halyqtyń amanatyn arqalaǵan soń, adamdar kútip otyrǵan soń, kóktemde ushyrady degen soń sol barlyǵyn jeńip shyqtyq dep oılaımyn, – deıdi ol.
Baýyrjan Jaqypov aqqýlardy týǵan jeri Sulýsor kóline ushyrýdy armandaǵan. Jaqynda bul tilegi oryndalyp, qustar óz mekenine qanat qaqty. Volonter qustardy jibergenimen, olardyń jaǵdaıyn baqylap turatynyn aıtady.
– Aman-esen ushyrdym. Kez kelgen adamda qımastyq bolady, mende de qımastyq bar. Eki-úsh kún buryn baryp qaradym, olar óz mekeninde júr, eshqaıda ketken joq. Jaz boıy olar sol kól betinde qorektenip júredi. Qys boıy birge ýaqyt ótkizgen soń, jaqyndasam tanımyn, – dep túıindedi Baýyrjan Jaqypov.
Aıta keteıik, aqqýlardy qutqarý isine jergilikti turǵyndar men janýarlardy qorǵaý ortalyǵynyń mamandary da atsalysqan.
Buǵan deıin, Pavlodar óńirine aqqýlar ushyp kele bastaǵanyn jazǵan edik.
