Pavlodar oblysynda menıngıtke shaldyqqandar qatary artty

PAVLODAR. KAZINFORM – Atalǵan aýrýǵa bes jasqa deıingi balalar kóp shaldyǵady. Sebebi, olardyń ımmýndyq júıesi tolyq qalyptaspaǵan. 

Ertis-Baıan óńirinde jyl basynan beri 22 adam menıngıttiń ártúrli etıologııadaǵy túrlerimen aýyrǵan. Onyń jartysynan kóbi – balalar. Ótken jyldyń sáıkes kezeńinde aýrýdyń 19 jaǵdaıy tirkelgen. Onyń ishinde 11 bala bar.

– Menıngıt – kóp jaǵdaıda sýyqtan paıda bolatyn aýrý, mı men julynnyń jumsaq qabyqtarynyń qabynýynan týyndaıdy. Aýrýdyń qozdyrǵyshtary ártúrli bolady. Іndet vırýs, bakterııa, sańyraýqulaq nemese parazıtterden paıda bolýy múmkin. Ásirese, menıngokokkty menıngıt óte qaýipti. Sebebi, ol tez órship, aýyr asqynýlar men ólimge ákelýi múmkin, - deıdi oblystyq sanıtarlyq-epıdemıologııalyq baqylaý departamentiniń basshysy Batyrbek Álıev.

Dárigerlerdiń aıtýynsha, aýrý aýa-tamshy joly arqyly jótelgende, túshkirgende jáne sóıleskende taralady. Aýrý juqqannan keıin aǵzada bas aýrý, loqsý, aýyz qurǵap, qyzý kóterilý, daýys qarlyǵyp, óńi bozarý sekildi ınkýbatsııalyq kezeń ótip, denede qyzǵylt tústi daqtar paıda bolady. Dene qyzýy 40 gradýsqa joǵarylap, bulshyq etteri aýyra bastaıdy. Jaryqqa qaraı almaı, qatty daýystan mezi bolady. Menıngıttiń alǵashqy belgileri baıqalǵan jaǵdaıda naýqas shuǵyl túrde ınfektsııalyq aýrýhanaǵa jatqyzylýy kerek.

Buǵan deıin Ekibastuz turǵyny aıaǵyna salynǵan ınektsııadan keıin qaıtys bolǵany týraly jazǵanbyz.