Pavlodar oblysynda máslıhat depýtattyǵyna 529 kandıdat tirkeldi
PAVLODAR. KAZINFORM — Ertis-Baıan óńirinde máslıhat depýtattarynyń kezekten tys saılaýyna birmandattyq saılaý okrýgteri boıynsha 529 kandıdat tirkelgen. Bul týraly oblystyq saılaý komıssııasynyń málimetinde aıtylǵan.
Óńirde depýtattardy saılaý 173 birmandattyq saılaý okrýgi boıynsha ótedi. Onyń ishinde oblystyq máslıhatqa — 16, qalalyq máslıhattarǵa — 51, aýdandyq máslıhattarǵa 106 okrýg bólingen.
— Qazirgi jaǵdaı boıynsha oblystyq máslıhat depýtattyǵyna 48 kandıdat, qalalyq máslıhattarǵa 155 kandıdat, al aýdandyq máslıhattarǵa 326 kandıdat tirkelgen. Osylaısha, bir mandatqa orta eseppen úsh úmitkerden keledi. Sonymen qatar oblystyq máslıhattyń taǵy 16 depýtaty partııalyq tizim boıynsha saılanady. Bul baǵytta oblystyq saılaý komıssııasyna bes saıası partııanyń partııalyq tizimi usynylyp, tirkelgen. Tizimderge barlyǵy 64 adam engizilgen, — dep málimdedi óńirlik saılaý komıssııasynan.
Saılaý komıssııasynyń málimetinshe, barlyq partııalyq tizimde áıelder men jastarǵa arnalǵan zańnamada belgilengen kvota talaptary saqtalǵan. Partııalyq tizim boıynsha bir depýtattyq mandatqa orta eseppen tórt kandıdat úmitker.
Oblystaǵy máslıhat depýtattarynyń kezekten tys saılaýyn uıymdastyrý jáne ótkizý jumystaryna barlyǵy 709 saılaý komıssııasy jumyldyrylǵan. Onyń ishinde 14 aýmaqtyq, 173 okrýgtik jáne 521 ýchaskelik saılaý komıssııasy bar. Olardyń quramynda jalpy sany 4306 adam jumys isteıdi.
Buǵan deıin máslıhat saılaýyn ótkizýge qansha qarajat bólingenin jazǵanbyz.
