Pavlodar oblysynda mas kúıinde kólik júrgizgen sheneýnik jumystan shyǵarylady

PAVLODAR. KAZINFORM — Ekibastuz qalalyq turǵyn úı-kommýnaldyq sharýashylyq bólimi basshysynyń orynbasary Aıdyn Qoıaǵanov ishimdik iship, kólik júrgizgen. Polıtseıler ony mas kúıinde kólik aıdaǵan sátinde ustaǵan.

Sheneýnik ótken jyldyń jeltoqsan aıynda Ekibastuzdaǵy turǵyn úıdiń aýlasynda mas kúıinde kólik júrgizgen. Polıtseıler ony tekserý úshin toqtatyp, keıin boıynda alkogoldiń býy bar ekenin kórsetken medıtsınalyq tekserýge jóneltken. Sot sheshimimen turǵyn úı-kommýnaldyq sharýashylyq bólimi basshysynyń orynbasary 15 táýlikke qamaýǵa alynyp, kólik júrgizý quqyǵynan 7 jylǵa aıryldy.

Bul oqıǵa tártiptik isti qaraýǵa sebepshi bolǵan. Óńirlik memlekettik qyzmet isteri departamentiniń qyzmetkerleri tıisti materıaldaryn jınap, Ádep jónindegi keńestiń qaraýyna shyǵarǵan.

— Bul kúni úıde balamnyń dene qyzýy kóterilgen edi. Dárihanaǵa shuǵyl barǵym keldi, taksı shaqyra almaǵan soń dereý kólikpen baryp kelý kerek boldy. Buǵan deıin men is-sharada boldym ári ınspektorlar meni úıimniń aýlasyndaǵy turaqta toqtatty, — dep túsindirdi jaǵdaıdy Aıdyn Qoıaǵanov.

Memlekettik qyzmetshi qatesin moıyndap, jumystan shyǵarmaýdy ótindi. Alaıda Ádep jónindegi keńes músheleri basqadaı sheshim qabyldaý múmkin emes dep uıǵaryp, sheneýnikti laýazymynan aıyrýdy usyndy.

Aıta keteıik, buǵan deıin Pavlodar oblysy ákiminiń ápkesi mas kúıinde kólik júrgizgeni úshin jazalanǵanyn jazǵanbyz.