Pavlodar oblysynda mal urlyǵymen aınalysqan úsh qylmystyq top quryqtaldy
PAVLODAR. KAZINFORM - Jyl basynan óńirde 322 bas mal urlanǵan. Qoldy bolǵan úı janýarlarynyń 142-si ıelerine qaıtarylǵan.
Polıtseılerdiń aıtýynsha, mal urlyǵy aýyldyq jerlerde keń taralǵan qylmystardyń biri bolyp otyr. Qylmyskerler kóbine top bolyp áreket etip, aýyl turǵyndaryna eleýli materıaldyq shyǵyn keltiredi. Qylmystyń bul túri ásirese sýyq túsken kezde jıileıdi.
- Jyl basynan beri Pavlodar oblysy aýmaǵynda 34 mal urlyǵy tirkelip, 322 bas mal urlanǵan. Qylmystyq áreketke jol bergen 20 adam jáne 3 qylmystyq top ustaldy. 142 bas mal tabylyp, ıelerine qaıtaryldy, - dep habarlady óńirlik Polıtsııa departamentiniń baspasóz qyzmetinen.
Kóptegen eldi mekende baqtashy joq. Qaraýsyz júrgen tórt túlikti qaskúnemder ózderiniń aram pıǵylyna paıdalanady. Al mal ıeleri túliktiń joǵalǵany týraly polıtsııaǵa kesh habarlaýy da qylmystyń jyldam ashylýyna múmkindik bermeıdi. Statıstıkaǵa súıensek, joǵalǵan maldardyń barlyǵy qaraýsyz jaıylymdarda urlanǵan.
Tártip saqshylary qazirgi ýaqytta zańsyz soıylǵan mal eti saýdalanýy múmkin bazarlardy baqylaýdy kúsheıte tústi.
Buǵan deıin ShQO-da polıtsııa mal urlyǵyna qatysy bar topty quryqtaǵanyn jazǵanbyz.