Pavlodar oblysynda mal urlyǵymen aınalysqan qylmystyq top ustaldy

PAVLODAR. KAZINFORM -Prokýrorlar men polıtseılerdiń birlesken arnaıy operatsııalarynyń nátıjesinde eki aýdanda qylmystyq toptar ustalǵan. Olardyń qylmystyq áreketterinen keltirilgen zalal 80 mıllıon teńgeden asady. 

Óńirlik polıtsııa departamentiniń habarlaýynsha, Aqqýly aýdanynda turǵyndardyń túlikterin urlap kelgen qylmystyq top músheleri áshkere bolǵan. Arnaıy operatsııa nátıjesinde 50-den astam jylqy men iri qara maldardy urlady degen kúdikpen 6 adam anyqtalyp, ustaldy.

Olardyń qylmystyq áreketterinen keltirilgen zalal kólemi 60 mıllıon teńgeden asady.

— Kúdiktiler aldyn ala qylmystyq rólderdi bólise otyryp, uıymdasqan túrde áreket etken. Urlanǵan jylqylar men iri qara maldar oqıǵa ornynda soıylyp, Abaı jáne Pavlodar oblystarynyń naryqtarynda satylǵan. Tórt eldi mekende tintý sharalary júrgizildi, onyń ekeýi kórshiles Abaı oblysynyń aýmaǵynda ornalasqan. Nátıjesinde 28 bas jylqy, mal terileri, úsh avtokólik, 8 birlik qarý jáne oq-dáriler tárkilendi. Atalǵan derek boıynsha sotqa deıingi tergep-tekserý júrgizilip jatyr. Ustalǵandardyń úsheýi ýaqytsha ustaý ızolıatoryna qamaldy, — dep málimdedi Pavlodar oblysy polıtsııa departamenti bastyǵynyń birinshi orynbasary Bolat Nurseıitov.

Sondaı-aq, Pavlodar oblysynyń Maı aýdanynda osyǵan uqsas qylmysqa qatysy bar 3 kúdikti anyqtalyp, qamaýǵa alynǵan. Olardyń 100-den astam iri qara maldy urlaýǵa qatysy bolýy múmkindigi tekserilip jatyr. Keltirilgen zalal 20 mıllıon teńgeden asady.

Eske sala keteıik, Atyraý oblysynda mal urlyǵyna qarsy blokbeketter qoıyldy.