Pavlodar oblysynda mal azyǵyna arnalǵan jaıylymdarǵa mol sý jiberildi
ASTANA. KAZINFORM — Pavlodar oblysyndaǵy 450-ge jýyq mal sharýashylyǵy qojalyǵyn jemshóppen qamtamasyz etý úshin Shiderti ózeniniń jaıylmasyna 115 mln tekshe metr sý jiberildi, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Bıyl «Qazsýshar» RMK-nyń Pavlodar fılıaly Shiderti lımandy sýarý júıesin sýmen qamtamasyz etý maqsatynda Shiderti ózeniniń jaıylmasyna tabıǵat qorǵaý maqsatynda 115 mln tekshe metr sý jiberdi. Nátıjesinde 21 myń gektar lıman sýǵa toldy.
Sý uzyndyǵy 67,45 shaqyrym bolatyn Shiderti magıstraldyq kanaly jáne uzyndyǵy 112 shaqyrymdy quraıtyn Shiderti sý jetkizý kanaly arqyly jiberildi.
Sý jiberý sharalary Áýlıekól kólder júıesindegi, sondaı-aq Basentın, Shyǵanaq, Bozaıǵyr jáne Jalaýly kólderindegi sý deńgeıin ustap turý úshin de qajet.
Tabıǵat qorǵaý sharalary Ekibastuz qalasynyń aýyldyq aımaǵyndaǵy jáne Aqtoǵaı aýdanyndaǵy alty aýyldyq okrýgte 450-ge jýyq aýyl sharýashylyǵy taýaryn óndirýshini mal azyǵymen qamtamasyz etýge múmkindik beredi.
— Óńirdiń ekojúıeleri men bıoalýantúrliligin saqtaý, sondaı-aq sý nysandaryn lastanýdan jáne sarqylýdan qorǵaý maqsatynda tabıǵat qorǵaý sharalary aıasynda jyl saıyn sý jiberiledi. Lımandar men tabıǵı jaıylymdardy sýlandyrý mal sharýashylyǵyn jemshóp qorymen qamtamasyz etip, jergilikti aýyl sharýashylyǵynyń damýyna yqpal etedi, — dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Buǵan deıin Qyzylorda oblysyndaǵy 181 kól júıesine 881 mln tekshe metrden astam sý jiberilgenin jazdyq.
