Pavlodar oblysynda kúzgi ańshylyq maýsymy ashylady
PAVLODAR. KAZINFORM - Oblys aýmaǵyndaǵy 38 ańshylyq sharýashylyǵynyń 28-inde ań aýlaýǵa ruqsat etilgen. Bıyl qustar boıynsha kvota 28 092 úırekke, 2034 qazǵa, 2086 qasqaldaqqa jáne 1179 qurǵa qarastyrylyp otyr.
Tamyzdyń 31-nen bastap oblys aýmaǵynda kúzgi-qysqy ańshylyq maýsymy ashylady. Atap aıtqanda, 31 tamyzdan 30 qarashaǵa deıin qaz, úırekti, qasqaldaqty, 1 qyrkúıek - 15 qarasha aralyǵynda borsyqty, 15 qyrkúıekten 30 qarashaǵa deıin qurdy, 2 qyrkúıekten 30 qarashaǵa deıin shildi, 2 qyrkúıek - 31 jeltoqsan aralyǵynda jabaıy shoshqany, 15 qyrkúıekten 31 jeltoqsanǵa deıin Sibir eliginiń analyǵy men laqtaryn, 1 qarashadan 2025 jyldyń 15 aqpanyna deıin qoıan, túlki, qarsaqty aýlaýǵa ruqsat beriledi. Al ıtpen jáne jyrtqysh qustarmen saıatshylyq jasaıtyndar úshin qoıan, túlki, qarsaq aýlaý kezeńi 15 qazannan 2025 jyldyń aqpan aıyna deıin dep kórsetilgen.
- Bekitilgen kvotaǵa sáıkes 28092 úırek, 2034 qaz, 2086 qasqaldaq jáne 1179 qur aýlaýǵa ruqsat etilgen.Buǵan qosa 130 qaraquıryq, 194 borsyq, 1730 sýyr, 5212 qoıan, 354 túlki, 87 qarsaq, 12 jabaıy shoshqa jáne 161 elik kvotaǵa endi. Kúzgi-qysqy ańshylyq maýsymy oblys aýmaǵyndaǵy 38 ańshylyq sharýashylyǵynyń 28-inde ruqsat etiledi. 10 ańshylyq sharýashylyǵynda kvota bólinbegendikten jáne rezervtik qorda turǵany sebepti ań aýlaýǵa tyıym salynǵan. Sondaı-aq «Qyzyltaý» zoologııalyq qoryǵy, Baıanaýyl ulttyq tabıǵı parki, «Ertis ormany» rezervatynda, «Ertis ózeniniń jaıylmasy» qoryǵynda ańshylyq júrgizýge qatań tyıym salynǵan,-deıdi Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Rýslan Tólepbaev.
Ańshylyqqa shyqqan adamda ańshy kýáligi, ańshylyq sharýashylyǵy sýbektisiniń joldamasy nemese janýarlar dúnıesin paıdalanýǵa ruqsattama, qarý saqtaýǵa jáne alyp júrýge ruqsattama, jyrtqysh qustarmen nemese ıttermen ań aýlaý kezinde olarǵa tıisti tólqujattar bolýy kerek. Maýsymdyq joldamanyń ortasha quny 14 myń teńgeden bastalady.
Janýarlardy zańsyz aýlaǵany nemese ańshylyq erejesiniń talaptaryn buzǵany úshin ákimshilik jáne qylmystyq jaýapkershilik qarastyrylǵan. Qustar men qylshyqty janýarlardyń bir danasy úshin keltirilgen zalalǵa 5 aılyq eseptik kórsetkish, tuıaqty janýarlarǵa 7,5-ten 750 aılyq eseptik kórsetkishke deıin aıyppul qarastyrylǵan.
Eske sala keteıik, Pavlodarda elik atqandar sottaldy.
