Pavlodar oblysynda qutqarý operatsııasyna qatysqan tikushaq apatty jaǵdaıda qondy
ASTANA. KAZINFORM — Pavlodar oblysynda izdestirý-qutqarý jumystaryna qatysqan «Qazavıaqutqarý» AQ-nyń Mı-8 AMT tikushaǵy apatty jaǵdaıda qondy. Bul týraly QR Kólik mınıstrligi habarlady.
Vedomstvonyń málimetinshe, UP-MI872 tirkeý nómirli áýe kemesi joǵalǵan adamdy izdeý boıynsha izdestirý-qutqarý jumystaryna jumyldyrylǵan.
— Bortta 13 adam boldy. Onyń ishinde 5 ekıpaj múshesi jáne 8 jolaýshy bar. Avıatsııalyq oqıǵa saldarynan qaza tapqandar joq. Zardap shekkender týraly aqparat naqtylanyp jatyr, — dep málim etti mınıstrlikten.
Al Tótenshe jaǵdaılar mınıstrligi tikushaq Baıdala aýyly mańynda 1950 jyly týǵan er adamdy izdeý operatsııasyna qatysqandyǵyn aıtady. Aldyn ala derek boıynsha, balyq aýlaýǵa shyqqan azamat mototsıklmen aýdarylyp, aıaǵyn jaraqattaǵannan keıin kómek suraǵan.
Іzdestirý jumystary bir táýlikke jýyq ýaqyt boıy júrgizilip, oǵan qutqarýshylar men eriktiler jumyldyrylǵan. Nátıjesinde er adam tabylyp, oǵan qajetti medıtsınalyq kómek kórsetildi.
— Tikushaq bortynda ekıpaj músheleri men qutqarýshylar bolǵan. Olardyń barlyǵy aman. Qaza tapqandar men zardap shekkender joq. Oqıǵanyń mán-jaıy anyqtalyp jatyr, — dedi QR TJM resmı ókili Dınara Nurǵalıeva.
Aıta keteıik, buǵan deıin, Qyzylorda oblysynda bir aılyq sábı TJM tikushaǵymen aýrýhanaǵa shuǵyl jetkizilgenin jazǵan edik.
