Pavlodar oblysynda quny 1 mlrd teńgege jýyq 4 jer ýchaskesi memleketke qaıtaryldy
PAVLODAR. KAZINFORM — Pavlodar oblysynyń tabıǵat qorǵaý prokýratýrasy júrgizgen taldaý nátıjesinde jer paıdalaný salasyndaǵy óreskel zańbuzýshylyqtar áshkerelendi.
Anyqtalǵan kemshilikter boıynsha qabyldanǵan sharalar negizinde kadastrlyq quny 1 mlrd teńgege jýyq 4 jer ýchaskesi memleket menshigine qaıtarylǵan.
Oblystyq prokýratýranyń baspasóz qyzmetinen habarlaǵandaı, tekserý barysynda jer telimderin berý kezinde zań talaptarynyń saqtalmaýy jáne olardyń uzaq ýaqyt boıy nysanaly maqsaty boıynsha paıdalanylmaý faktileri belgili bolǵan.
Atap aıtqanda, Ekibastuz óńirinde jeke orman ósirý úshin berilgen 797 gektar jerde Jer kodeksiniń 65-babyna qaıshy túrde eshqandaı aǵash otyrǵyzý jumystary júrgizilmegen.
Sonymen qatar Tereńkól jáne Aqqýly aýdandarynda Sý kodeksiniń talaptary buzylǵan. Sý aıdyndaryn bekitýdiń bekitilgen tártibine sáıkes mindetti kelisý protsedýralary ótkizilmesten, balyq sharýashylyǵyn júrgizý úshin úshinshi tulǵalarǵa sý qorynyń 820 gektar jeri zańsyz berilip ketken.
— Tabıǵat qorǵaý prokýratýrasy anyqtalǵan buzýshylyqtar boıynsha ýákiletti organdarǵa qadaǵalaý aktisin engizdi. Nátıjesinde jalpy aýdany 1600 gektardan asatyn, kadastrlyq quny 1 mlrd teńgege jýyq paıdalanylmaǵan jer ýchaskeleri memleketke qaıtaryldy, — delingen prokýratýra habarlamasynda.
Zańbuzýshylyqtarǵa jol bergen kináli laýazymdy tulǵalar, onyń ishinde Jer qatynastary bólimderiniń basshylary tártiptik jaýapkershilikke tartylǵan.
Pavlodar soty banktiń jetim azamatqa memlekettik qoldaýdy toqtatýyn zańsyz dep tanydy.
