Pavlodar oblysynda quny 100 mln teńgeden asatyn zańsyz veıp satpaq bolǵan top ustaldy
ASTANA. KAZINFORM – Qarjylyq monıtorıng agenttiginiń Pavlodar oblysy boıynsha departamenti Ekibastuz qalasynda elektrondy tutyný júıelerin (veıpter), olarǵa arnalǵan hosh ıistendirgishter men suıyqtyqtardy zańsyz aınalymǵa shyǵarýmen aınalysqan topty anyqtady.
Agenttiktiń baspasóz qyzmetiniń habarlaýynsha, tyıym salynǵan ónimder Telegram messendjerindegi «VAPE SHOP MAXI MALL» arnasy arqyly satylyp, kýrer arqyly jetkizilip otyrǵan.
Nátıjesinde 5 600-den astam veıp pen olardyń bólikteri tárkilendi. Atalǵan ónimder satylǵanda qylmystyq tabys 100 mln teńgeden asatyn edi.
Jedel-izdestirý sharalary barysynda qoıma men satý núkteleri anyqtaldy.
Erekshe nazar aýdaratyn jaıt — bul ónimder kámeletke tolmaǵandar, sonyń ishinde mektep oqýshylary arasynda keńinen taralǵan. Zańsyz bıznesti uıymdastyrýshylar elektrondy temekilerdi jasóspirimderge satyp, olardyń densaýlyǵyna qaýip tóndirgen.
Tergeý amaldary jalǵasýda.
QR Qylmystyq-protsestik kodeksiniń 201-babyna sáıkes ózge aqparat jarııa etilmeıdi.
2025 jyldyń basynan beri Agenttik veıpterdiń zańsyz aınalymyna qatysty 32 derekti tirkedi, 440 myńnan astam buıym tárkilenip, joıyldy.
Aıta ketý kerek, veıp qoldaný densaýlyqqa eleýli qaýip tóndiredi, óıtkeni olardyń quramyndaǵy zattar júrek-qantamyr jáne tynys alý júıelerine keri áser etip, ınsýlt, ınfarkt jáne basqa da aýrýlardyń damý qaýpin arttyrady.
Osyǵan deıin jyl basynan beri veıpterdiń zańsyz aınalymyna qatysty 32 derek tirkelgeni týraly jazdyq.