Pavlodar oblysynda qos azamattyqtyń 27 deregi anyqtaldy
PAVLODAR. KAZINFORM - Ertis-Baıan óńirinde jyl basynan beri qos azamattyqtyń 27 fderegi anyqtalyp, zań buzýshylar jaýapqa tartyldy.
Oblystyq polıtsııa departamentiniń kóshi-qon qyzmeti bólimsheleri memlekettik organdarmen birlesip, qos azamattyq faktilerin anyqtaý boıynsha turaqty túrde jumys júrgizip keledi.
Qazaqstan Respýblıkasynda qos azamattyqqa jol berilmeıdi. ıAǵnı azamat bir ýaqytta Qazaqstan Respýblıkasynyń jáne ózge memlekettiń azamaty bola almaıdy. Eger QR azamaty ózge memlekettiń azamattyǵyn qabyldasa, ol Qazaqstan Respýblıkasynyń azamattyǵynan aıyrylady.
- Jyl basynan Pavlodar oblysynda 398 azamattyń Qazaqstan Respýblıkasynyń azamattyǵyn joǵaltqany tirkeldi. Kóshi-qon zańnamasyn ártúrli jaǵdaıda buzǵany úshin 40 azamat ákimshilik jaýapkershilikke tartyldy, olardyń 7-eýi el aýmaǵynan shyǵaryldy, — dep habarlady Pavlodar oblysy polıtsııa departamenti kóshi-qon qyzmeti basqarmasynyń bastyǵy Aleksandr Kýzmenko.
Máselen, 26 jastaǵy áıel 2015 jyldan beri kórshi eldiń azamaty bola tura, bul týraly polıtsııa organdaryna habarlamaǵan. Al 29 jastaǵy taǵy bir áıel kórshi eldiń azamattyǵyn alǵanyna qaramastan, memlekettik shekaradan Qazaqstan Respýblıkasynyń pasportymen ótken.
Atalǵan áıelder ákimshilik jaýapkershilikke tartylǵan. Zańnama boıynsha 100 AEK mólsherinde aıyppul salý nemese el aýmaǵynan shyǵaryp jiberý túrindegi jaýapkershilik kózdelgen.
- Qazaqstan Respýblıkasynyń azamattyǵyn joǵaltqan adamdardyń el azamatynyń qujattaryn paıdalanǵany úshin 200 AEK mólsherinde aıyppul qarastyrylǵan, — dep túsindirdi oblystyq kóshi-qon qyzmetiniń basshysy.
Eske sala keteıik, Shyǵys Qazaqstanda 6 adam qos azamattyqpen júrgen.
