Pavlodar oblysynda qos azamattyqqa qatysty myńnan astam derek anyqtaldy

PAVLODAR. KAZINFORM — Ertis-Baıan óńiriniń polıtseıleri qos azamattyqa qatysty 1047 derekti tirkedi. Qazaqstan zańnamasyna sáıkes, azamattarǵa qos azamattyq alýǵa tyıym salynǵan.

Bul týraly óńirlik polıtsııa departamentinen habarlady.

— Bıyl Pavlodar oblysynyń aýmaǵynda qos azamattyqtyń 1047 deregi anyqtaldy. Basqa memlekettiń azamattyǵyn alý deregi týraly ýaqtyly habarlamaǵany úshin, sondaı-aq Qazaqstan Respýblıkasynyń azamattyǵynan aıyrylǵan QR qujattaryn paıdalanǵany úshin 28 adam jaýapty boldy. Sondaı-aq Germanııa, AQSh, Túrkııa, Polsha, Ispanııa, Chehııa elderinde azamattyǵyn joǵaltýdy tirkeý derekteri bar, — dedi polıtsııa departamenti kóshi-qon qyzmeti basqarmasynyń bastyǵy Qanat Sartov.

Zań boıynsha ózge memlekettiń azamattyǵy qabyldanǵan jaǵdaıda adamǵa belgilengen merzimde (30 kún) kóshi-qon qyzmeti organdaryn habardar etý jáne Qazaqstan Respýblıkasynyń azamattyǵynan aıyrylýyn tirkeý qajet. Ókinishke qaraı, bizdiń elimizdiń azamattary kóp jaǵdaıda shet memlekettiń azamattyǵyn alyp, Qazaqstan azamattyǵyn joǵaltýdy tıisinshe resimdemedi. Saldarynan zańsyz qos azamattyǵy bar jaǵdaılar jıi kezdesedi. Ekinshi jaǵynan ol belgili bir materıaldyq paıda alýdy kózdeıdi. Mysaly, zeınetaqy esebi, bala týýǵa qatysty tólenetin járdemaqylar.

Eske sala keteıik, bıyl 550 sheteldik azamat Qazaqstanda bilim alady.