Pavlodar jáne Abaı oblystarynda kólik qozǵalysyna shekteý qoıyldy
ASTANA. KAZINFORM — Joldy 2026 jyly 8 naýryz saǵat 09:00–de ashý josparlanǵan, dep habarlaıdy «QazAvtoJol» UK baspasóz qyzmeti.
— 2026 jylǵy 7 naýryz saǵat 22:00–de aýa raıynyń buzylýyna baılanysty respýblıkalyq mańyzy bar KAZ07 «QHR shekarasy — Maıqapshaǵaı — Zaısan qalasyn aınalyp ótý — Qalbataý — Semeı — Pavlodar — RF shekarasy» avtojolynyń 426 — 587 shaqyrym aralyǵynda (Kenjekól aýyly — Abaı oblysynyń shekarasy) kóliktiń barlyq túrleri úshin qozǵalysqa shekteý engiziledi. 1403 baılanys ortalyǵyna habarlasyp, táýlik boıy qosymsha aqparat alýǵa bolady, — delingen habarlamada.
Sonymen qatar Abaı oblysynda da kún raıyna baılanysty joldar jabyldy.
— 2026 jylǵy 7 naýryz saǵat 22:00-de Pavlodar oblysyndaǵy aýa raıynyń buzylýyna baılanysty respýblıkalyq mańyzy bar KAZ07 «QHR shekarasy — Maıqapshaǵaı — Zaısan qalasyn aınalyp ótý — Qalbataý — Semeı — Pavlodar — RF shekarasy» avtojolynyń 587 — 733 shaqyrym aralyǵynda (Pavlodar oblysynyń shekarasy — Semeı qalasy) kóliktiń barlyq túrleri úshin qozǵalysqa shekteý engiziledi, — dep eskertti QazAvtoJol.
Osyǵan deıin eki oblysta aýa raıyna baılanysty joldar jabylǵanyn jazǵan edik.
