Pavlodar oblysynda kóktemgi mezgilde qandaı qustardy aýlaýǵa bolady
PAVLODAR. KAZINFORM — Óńirdegi ańshylyq alqaptarynda qustardyń birneshe túrine ańshylyq jasaýǵa ruqsat berilip otyr. Ańshylyq merzim 18 sáýirden bastalyp, eki aptaǵa sozylady.
Bul týraly Pavlodar oblysynyń orman sharýashylyǵy jáne janýarlar dúnıesi aýmaqtyq ınspektsııasynan habarlady.
— Ertis-Baıan óńirindegi ańshylyq jasaýǵa bolatyn alqaptarda kóktemgi ańshylyqqa ruqsat beriledi. Zańnamada belgilengen talaptardy saqtaı otyryp, úırekter men qurdyń atalyǵyna ǵana myltyq kezeýge bolady. Kóktemgi ań aýlaý kezinde qustardyń jynystyq belgilerine erekshe nazar aýdarýdy suraımyz. Ań aýlaý qaǵıdalaryn buzǵany úshin ákimshilik jáne qylmystyq jaýapkershilik kózdelgen, — dep málimdedi ınspektsııadan.
Atap aıtqanda, 18 sáýir — 2 mamyr aralyǵynda Aqtoǵaı, Jelezın, Maı, Baıanaýyl, Pavlodar, Aqqýly aýdandary men Aqsý, Ekibastuz qalalarynyń aýyldyq aımaqtarynda, al 25 sáýir — 9 mamyr aralyǵynda Tereńkól, Ertis, Sharbaqty, Ýspen aýdandary aýmaǵyndaǵy ańshylyq sharýashylyqtarda myltyq kezenýge bolady.
Eske sala keteıik, Almaty oblysynda zańsyz qarý men ańshylyqqa qatysty 6 qylmystyq is qozǵaldy.
