Pavlodar oblysynda kóktemgi egis boıynsha 21 myń tonna tuqym tapshylyǵy bar

PAVLODAR. KAZINFORM — Tuqymnyń jetispeıtin kólemin fermerler shetten satyp alýy múmkin. Buǵan qosa óńirdegi aýyl sharýashylyq tehnıkalarynyń 80 paıyzy eskirgen.

Bıyl aımaqtaǵy egis alqaby 1 mln 657,6 myń gektardy quraıdy dep josparlanǵan. Ótken jylmen salystyrǵanda 8,1 myń gektarǵa ulǵaıady.

Óńirlik aýyl sharýashylyǵy basqarmasy basshysynyń mindetin atqarýshy Tólegen Kósherbaevtyń aıtýynsha, kóktemgi dala jumystary úshin 174,4 myń tonna tuqym qajet.

Onyń ishinde dándi jáne dándi-burshaqty daqyldar boıynsha — 111,3 myń tonna, maıly daqyldar — 3,3 myń tonna, jemshóp daqyldary — 2,4 myń tonna, kartop — 57,4 myń tonna.

— Oblys boıynsha tuqymnyń jalpy jetispeýshiligi — 21 myń tonna. Ol óńirden tabylmasa, ózge aımaqtardan, shet memleketterden satyp alynady. Satyp alý protsesteri «Azyq-túlik korporatsııasy» AQ arqyly rásimdeledi, — deıdi ol.

Oblysta barlyǵy 49 358 birlik aýyl sharýashylyǵy tehnıkasy men túrli jabdyqtar bar bolsa, onyń 39 327-si nemese 79,7% paıyzy tozyp ketken. 

2024 jylǵy kóktemgi dala jumystaryn júrgizý úshin Pavlodar oblysyna 25,7 myń dızel otyny bólingen. Onyń «LF TRADE» JShS jáne «TK Parnas» JShS operatorlary jetkizýmen aınalysyp jatyr. Traktor otynynyń bir tonnasy 282,4 teńgege bosatylýda.

Aıtyp óteıik, aldaǵy egin sharýashylyǵyn qoldaý úshin bıýdjetten 5,9 mlrd teńge sýbsıdııa qarastyrylǵan.