Pavlodar oblysynda qyzmettik ıtter 935 teńgeden satylǵan
PAVLODAR. KAZINFORM - Otanymyzǵa 9 jylǵa jýyq adal qyzmet etken saqshy janýarlar shekti jasqa tolýyna baılanysty qoldanystan shyǵarylyp, satýǵa qoıylǵan.
Mateo, Madam jáne Maıorka esimdi nemis ovcharkalary Pavlodar oblysynyń túrli aýdandarynda shekarashylarmen birge qyzmet atqarǵan. Itterdiń jastaryn eskere kele, olardy satý týraly sheshim qabyldanǵan.
Aýktsıon baǵany tómendetý tásilimen ótti. Ár ıttiń bastapqy baǵasy 935 teńge, al eń tómengi baǵasy 94 teńge boldy. Nátıjesinde janýarlar bastapqy baǵasymen árqaısysy 935 teńgeden satyldy.
QR Ulttyq qaýipsizdik komıteti tóraǵasynyń 2015 jylǵy 5 mamyrdaǵy №32 buıryǵymen bekitilgen «Qazaqstan Respýblıkasy Ulttyq qaýipsizdik komıtetiniń Shekara qyzmeti men Shekara akademııasyn qyzmettik janýarlarmen qamtamasyz etý normasyna» sáıkes, qyzmettik ıttiń shekti jasy 8 jas 3 aı.
- Baǵalanǵan qyzmettik janýarlardyń jasy belgilengen mejeden edáýir asyp ketken (9 jas). Qazirgi ýaqytta bul múlik óziniń tikeleı maqsaty boıynsha jartylaı paıdalanylmaıdy jáne balans ustaýshynyń qaramaǵynda kútip-ustalýda, - delingen múlikti baǵalaý týraly esepte.
Itter QR UQK Shekara qyzmetiniń Pavlodar oblysy boıynsha departamentine tıesili bolǵan. Saýda-sattyqty «Qazspetseksport» JShS ótkizdi.
Eske sala keteıik, Jambyl oblysynda ıisshil ıtterdiń kómegimen 38 esirtki qylmysy ashyldy.
