Pavlodar oblysynda kıikterdiń sany bir jylda tórt ese ósip, 120 myńǵa jetken
PAVLODAR. KAZINFORM - Oblys aýmaǵynda Betpaqdala popýlıatsııasyna jatatyn kıikter mekendeıdi. Mamandar bir-eki kúnde jabaıy janýarlardyń tóldeıtin kezeńi bastalady dep boljaıdy.
Ertis-Baıan óńirindegi kıikterdiń sany byltyrǵy jyldyń uqsas kezeńimen salystyrǵanda 4 ese ósken.
- Aýmaqtyq ınspektsııa mamandary, Qazaqstan bıoalýantúrlilikti saqtaý qaýymdastyǵy, sondaı-aq «PO «Ohotzooprom ÓB» Pavlodar oblysyndaǵy RMQK qyzmetkerleri birlesip kıikterge avıatsııalyq esep júrgizdi. Onyń nátıjeleri boıynsha aýmaqtaǵy kıikterdiń sany shamamen 120 000 basqa jýyq ekeni anyqtaldy, - dep habarlady Kazinform tilshisine Pavlodar oblystyq Orman sharýashylyǵy jáne janýarlar dúnıesi aýmaqtyq ınspektsııasynan.
Kıikter - juptuıaqty sútqorekti janýar, dala eshkileriniń turqy kishi tuqymdasyna jatady. Pavlodar oblysynyń aýmaǵynda Betpaqdala popýlıatsııasyna tıesili kıikter taraǵan. Olardyń negizgi tirshilik etý, tóldeý jáne kóship-qoný aýmaqtary Maı, Baıanaýyl aýdandary men Aqsý, Ekibastuz aýyldyq aımaqtarynda ornalasqan. Mamandardyń aıtýynsha, endi bir-eki kúnde kıikter jappaı tóldeı bastaıdy.
- Olardyń tóldeıtin belgili bir oryndary da bar, aınalasy jaqsy kórinetin jazyq aýmaqtardy tańdaıdy. Jyl saıyn sol jerde shoǵyrlanyp, kóbeıý úrdisi júredi. Sońǵy úsh jyldaǵy baqylaýǵa súıensek, kıikterdiń tóldeýi negizinen Aqsý aýyldyq aımaǵy men Maı aýdandarynyń aýmaqtarynda ótedi, - dep qosty ınspektsııadan.
Eske sala keteıik, byltyr mamyr aıynda Pavlodar oblysynda 30 myńnan asa kıik bar ekeni týraly jazǵanbyz.
Sondaı-aq Pavlodar oblysynda bıyl qysta qyrylǵan kıikterdiń sany úsh ese kóp ekenin anyqtaǵan edik.
