Pavlodar oblysynda qaıtarylǵan jerdiń 99%-y qaıta aınalymǵa engizildi
PAVLODAR. KAZINFORM – Aımaqta bıyl memleketke 70 myń gektar jerdi qaıtarý josparlanǵan. Jyl qorytyndysy boıynsha naqty kórsetkish 82,8 myń gektarǵa jetip, jospar 118 paıyzǵa oryndaldy.
Pavlodar oblysynda 2022-2025 jyldary paıdalanylmaı turǵan 940,6 myń gektar aýyl sharýashylyq jeri memleketke qaıtarylǵan. Onyń 98,9 paıyzy qaıtadan aýyl sharýashylyǵy aınalymyna engizilgen.
Óńir ákimdiginiń málimetinshe, qaıtarylǵan jerlerdiń 930,8 myń gektary aýyl sharýashylyǵy maqsatynda paıdalanýǵa berilgen. Sonymen qatar 188,9 myń gektar jer aýyl turǵyndarynyń qajettiligine, negizinen jaıylym retinde qaıta bólindi. Al 7,3 myń gektar jer Ekibastuz qalasynda ınvestıtsııalyq jobalardy júzege asyrý úshin rezervke alynǵan.
– Memleketke qaıtarylǵan jer paıdalanylýy kerek. Eń aldymen, aýyl turǵyndaryn jaıylymmen qamtamasyz etý qajet. Jer resýrstary paıdalanylmaı jatqan kezde adamdardyń jaıylym tapshylyǵyn sezinýine jol berýge bolmaıdy. Jer bólý kezinde jumys isteýge, óndiristi damytýǵa jáne jumys oryndaryn ashýǵa daıyn azamattarǵa basymdyq berilýge tıis, – dep habarlady oblys ákimdiginen.
Sondaı-aq jańa jyldan bastap jer ýchaskelerin berý konkýrstaryn elektrondyq formatqa kóshirý josparlanyp otyr. Jer bólý kezinde ózekti topyraq kartalary, jerdi bonıtetteý materıaldary jáne geobotanıkalyq zertteýlerdiń nátıjeleri eskeriledi.
Eske sala keteıik, Qyzylorda oblysynda ıgerýsiz jatqan 1 570 gektardan astam jer memleketke qaıtaryldy.