Pavlodar oblysynda «Qaýipsiz qala» jobasynan shıkilik shyǵyp, qylmystyq is qozǵaldy

Pavlodar oblysyndaǵy «Qaýipsiz qala» jobasy áý basta qoǵam men jol qaýipsizdigin arttyrýdy kózdegen edi. Ony iske asyrý úsh jylǵa josparlanyp, bıýdjeti 9 mıllıard teńge kóleminde bekitilgen.

2025 jyly Pavlodar, Ekibastuz, Aqsý qalalarynda, sondaı-aq óńirdegi tas joldarda apparattyq keshender men kameralardy ornatý jumystary belsendi júrgizildi. Alaıda bıyl jobany júzege asyrý barysynda birqatar zań buzýlar anyqtalyp, Ekonomıkalyq tergep-tekserý departamentiniń qyzmetkerleri qylmystyq is boıynsha tergeý bastaǵany belgili boldy.

Bul rette Pavlodar oblysy tsıfrlyq tehnologııalar basqarmasynyń burynǵy basshysy kúdikke ilinip otyr.

Oblystyq ekonomıkalyq tergep-tekserý departamenti bastyǵynyń orynbasary Ǵalıasqar Qalıev Kazinform tilshisiniń saýalyna:

- 2026 jylǵy 19 naýryzda QR Bas prokýratýrasy sotqa deıingi tergep-tekserýdi júrgizýdi Ulttyq qaýipsizdik komıtetiniń Pavlodar oblysy boıynsha departamenti Sotqa deıingi tergep-tekserý basqarmasyna bergenin habarlaımyz, - dep jaýap berdi.

Al Ulttyq qaýipsizdik komıtetiniń departamenti sotqa deıingi tergeý amaldary júrip jatqanyn, ózge aqparat tergeý múddesine sáıkes jarııa etilmeıtinin málimdedi.

Pavlodar oblysy ákimdiginiń dereginshe, «Qaýipsiz qala» jobasyn iske asyrý aıasynda oblystyń úsh qalasynda jáne tas joldarynda 416 apparattyq-baǵdarlamalyq keshen, sondaı-aq Pavlodar qalasynda 3 myń jalpy beınebaqylaý kamerasy ornatylǵan.

- Qazirgi ýaqytta tergeý is-sharalarynyń júrgizilýi aıasynda, tehnıkalyq erekshelikte kórsetilgen talaptardyń sáıkestigine tehnıkalyq saraptama júrgizý úshin 12 apparattyq-baǵdarlamalyq keshen Pavlodar oblysy boıynsha ekonomıkalyq tergep-tekserý departamentiniń qyzmetkerlerimen bólshektelip alyndy, - dep túsindirdi ákimdikten.

Eske sala keteıik, Pavlodarda túzeý mekemesiniń qyzmetkeri para alǵany úshin 6 jylǵa sottaldy.