Pavlodarda hakaton qatysýshylaryna alaıaqtyqqa qarsy baǵdarlamalar usynyldy
PAVLODAR. KAZINFORM — Stýdentter 24 saǵat ishinde túrli taqyrypta, sonyń ishinde ınternet-alaıaqtyqpen kúresýde biregeı qosymsha jasaýy kerek, dep habarlaıdy Kazinform agenttiginiń tilshisi.
Pavlodarda ótken «Innovatsııa» hakatonyna elimizdiń 17 oblysynan, sondaı-aq Qazaqstannyń respýblıkalyq mańyzy bar qalalarynan qatysýshylar keldi. Barlyǵy 27 komanda bar.
Іs-sharanyń ashylý saltanatyna Pavlodar oblysy ákiminiń orynbasary Aıgúl Málikova qatysty. Onda atalmysh baıqaýdyń ekinshi jyl qatarynan ótkizilip otyrǵany, bul joly jumysshy mamandyqtary jylyna oraılastyrylǵany atap ótildi. Munan soń barlyq komandalarǵa tehnıkalyq tapsyrmalar berildi.
– Hakatonnyń maqsaty – jastar arasynda IT daǵdylaryn, baǵdarlamalaý daǵdylaryn damytý jáne tájirıbe almasý. Búgin hakatonnyń tehnıkalyq tapsyrmasy berildi jáne 24 saǵat ishinde qatysýshylar jobasyn ázirlep, sodan keıin ony qorǵaýy kerek. Tehnıkalyq sharttar qazylar alqasymen birlesip ázirlendi. Bul tsıfrlandyrýdyń, kıberqaýipsizdiktiń, alaıaqtyqpen kúrestiń ózekti máseleleri, jas mamandarǵa jańa jumys tabý baǵdarlamalary, jastarǵa arnalǵan túrli áleýmettik platformalar, - dedi Pavlodar oblysy bilim basqarmasynyń aqparattyq tehnologııalar ortalyǵynyń basshysy Elnar Ótebaev.
Tapsyrmany oryndaý úshin qatysýshylarǵa 24 saǵat beriledi. Osy ýaqyt ishinde stýdentter men kolledj túlekteri tańdalǵan taqyryptardyń biri boıynsha biregeı qosymsha jasap, baǵdarlama ázirleýi kerek. Odan keıin quramyna QR Bilim mınıstrligi, Tsıfrlyq damý, ınnovatsııalar jáne aeroǵarysh ónerkásibi mınıstrligi, Astana Hub halyqaralyq tehnoparki, joǵary oqý oryndary men IT-kompanııalarynyń ókilderi kiretin qazylar alqasyna joba usynylady.
– Hakaton – bul bastapqy kezeń ǵana. Munda olar tek baǵdarlamalaý daǵdylary men jyldamdyǵynda básekelesedi. Belgili bir tehnıkalyq máseleni qysqa merzimde sheshýi kerek. Sodan keıin osy jobalardy damyta alady jáne ártúrli startap jobalarǵa qatysyp, grant utyp ala alady nemese shaǵyn bıznesti damytýǵa nesıe ala alady, - dep qosty Elnar Ýtýbaev.
Aıta keteıik, 27 komanda baq synap jatqan hakatonnyń júlde qory 3,5 mıllıon teńgeni quraıdy.