Pavlodar oblysynda eki myńǵa jýyq júrgizýshi jaýapqa tartyldy
ASTANA. KAZINFORM — Pavlodar oblysynda jyl basynan beri baǵdarshamnyń qyzyl túsine ótýge baılanysty 2 myńǵa jýyq quqyqbuzýshylyq anyqtaldy. Polıtsııa júrgizýshilerdi jol qozǵalysy erejelerin qatań saqtaýǵa shaqyrady, dep habarlaıdy Polisia.kz.
— Baǵdarshamnyń tyıym salatyn sıgnalyna ótý — jol-kólik oqıǵasyna jáne aýyr zardaptarǵa ákep soǵýy múmkin jol qozǵalysy erejelerin buzýdyń qaýipti túrleriniń biri. Kóbine júrgizýshiler asyǵyp, manevrdi qyzyl sham janǵan kezde aıaqtaýǵa tyrysyp, ózderin jáne jol qozǵalysynyń basqa da qatysýshylaryn qaýipke ushyratady, — delingen aqparatta.
Jyl basynan beri Pavlodar oblysynda polıtseıler baǵdarshamnyń tyıym salatyn sıgnalyna ótken júrgizýshilerge qatysty eki myńǵa jýyq quqyq buzýshylyqtyń jolyn kesti. Máselen, Pavlodar qalasyndaǵy Sátbaev — Toraıǵyrov kósheleriniń qıylysynda Audi avtokóliginiń júrgizýshisi baǵdarshamnyń qyzyl sıgnalyna ótip, ózin, kóliktegi jolaýshylardy jáne joldy basqa baǵytta kesip ótip bara jatqan ózge de qozǵalys qatysýshylaryn qaýipke ushyratqan.
Quqyq buzýshy ákimshilik jaýapkershilikke tartylyp, oǵan aıyppul salyndy.
Pavlodar oblysynyń polıtsııa departamenti qabyldanyp jatqan sharalar azamattardyń ómiri men densaýlyǵyn qorǵaýǵa, sondaı-aq jol qozǵalysy qaýipsizdigin qamtamasyz etýge baǵyttalǵanyn atap ótti.
Polıtsııa júrgizýshilerdi jol qozǵalysy erejelerin qatań saqtap, baǵdarshamnyń talaptaryn oryndaýǵa shaqyrady.
Aıta keteıik, ІІM elimizde jyl basynan beri 372 drıft faktisin anyqtady.
