Pavlodar oblysynda daýyldan eki áıel zardap shekti
PAVLODAR. KAZINFORM — Dárigerlerdiń habarlaýynsha, Aqtoǵaı aýdanynda áıel adamdy shatyrdan ushqan shıfer zaqymdasa, ekinshi jaǵdaıda zardap shegýshiniń basyna aǵash butaǵy qulap túsken.
Pavlodar oblystyq jedel járdem stansasy 26 sáýir kúni ekpindi jeldiń saldarynan eki jazataıym oqıǵa tirkelgenin habarlady. Alǵashqy shaqyrtý Aqtoǵaı aýylynan túsken. 41 jastaǵy áıeldiń basyna shıfer bóligi qulaǵan.
— Emdelýshi Aqtoǵaı aýdandyq aýrýhanasyna saǵat 15:30–da bettegi tilik jaraqatymen tústi. Aýrýhanaǵa túsken kezdegi jaǵdaıy ortasha aýyrlyq dárejesinde boldy. Alǵashqy medıtsınalyq kómek kórsetilip, jaǵdaıy turaqtandyryldy, — dep atap ótti oblystyq densaýlyq saqtaý basqarmasynan.
Al Pavlodar qalasynda aǵashtan úlken butaq qulap, 34 jastaǵy áıel zardap shekken. Áıelde jabyq bas-súıek jaraqaty, mıdyń shaıqalýy jáne mańdaı tusynyń qatty soqqy alǵany anyqtalǵan.
Óńirlik tótenshe jaǵdaılar departamenti 26 sáýir kúni Pavlodar oblysynyń alty aýdanynda shatyrlardyń ushýy boıynsha 29 jaǵdaı tirkelgenin málimdedi. Jeldiń ekpini sekýndyna 28 metrge deıin jetken. Kópqabatty jáne jeke turǵyn úılerde, bilim berý jáne densaýlyq saqtaý mekemelerinde, ákimshilik ǵımarattar men saýda nysandarynda shatyrlar zaqymdanǵan.
— 36 eldi mekende elektr energııasynyń óshýi tirkeldi. Qazirgi ýaqytta oblystyń 14 eldi mekeninde 1009 abonent jaryqsyz qalyp otyr. Jóndeý-qalpyna keltirý jumystary júrgizilip jatyr. Qazirgi sátte barlyq jedel jáne kommýnaldyq qyzmetter daýyl saldaryn joıýdy jáne zaqymdalǵan ınfraqurylymdy qalpyna keltirýdi jalǵastyrady, — dep habarlady óńirlik tótenshe jaǵdaılar departamentinen.
Eske sala keteıik, naýryz aıynyń basynda daýyl saldarynan Pavlodar óńirinde 33 ǵımarattyń shatyry zaqymdanǵan.