Pavlodar oblysynda daýyldan 49 turǵyn úı búlindi
PAVLODAR. KAZINFORM — 19 shilde kúni jyldamdyǵy sekýndyna 20 metrge deıin jetken qatty daýyldy jel men burshaqtyń saldarynan Pavlodar oblysynyń birqatar eldi mekeninde turǵyn úılerge, áleýmettik nysandarǵa jáne elektr jelisi sharýashylyǵy nysandaryna zaqym keldi.
Pavlodar oblysy ákimdiginiń málimetinshe Aqsý qalasyna qarasty Qalqaman kenti men Ekibastuz qalasynyń Qudaıkól aýyly eń kóp zardapshekti. Munda 2 kópqabatty turǵyn úı men 47 jeke turǵyn úıdiń shatyrlary ishinara ushyp ketken. Sonymen qatar Qalqaman kentinde 2 mektep pen mádenı-demalys ortalyǵynyń qasbeti men terezeleri búlinip, kópqabatty turǵyn úılerdiń birindegi birneshe páterdiń ishki qabyrǵalary qulaǵan.
— Qolaısyz aýa raıynyń saldarynan Aqsý jáne Ekibastuz qalalaryna qarasty 11 eldi mekende elektr energııasy apatty jaǵdaıda óshirildi. Eýrazııalyq energetıkalyq korporatsııasynyń Qalqaman-Qudaıkól ýchaskesindegi kerneýi 220 kV elektr jetkizý jelisiniń 8 baǵanasy zaqymdandy. Qazirgi ýaqytta energetıka qyzmetteriniń kúshimen qalpyna keltirý jumystary júrgizilýde. 8 aýyldyq eldi mekende elektrmen jabdyqtaý jelileri tolyq qalpyna keltirildi, al 3 eldi mekende qalpyna keltirý jumystary jalǵasyp jatyr, — delingen ákimdik habarlamasynda.
Keltirilgen zardap kólemin baǵalaý úshin oqıǵa ornyna Pavlodar oblysynyń ákimi Asaıyn Baıhanov bardy. Óńir basshysy zaqymdanǵan nysandardy aralap, turǵyndarmen kezdesti jáne salalyq basqarmalar, jergilikti atqarýshy organdar, azamattyq qorǵaý qyzmetteri men kommýnaldyq kásiporyndar basshylarynyń qatysýymen jedel jınalys ótkizdi.
Oblys ákimi qysqa merzim ishinde barlyq zaqymdanǵan nysandardy tekserýdi, elektrmen jabdyqtaý júıelerin tolyq qalpyna keltirýdi, shatyrlar men búlingen basqa da qurylymdardy jóndeýdi, sondaı-aq zardap shekken úılerdiń turǵyndaryna qajetti kómek kórsetýdi tapsyrdy. Sonymen qatar áleýmettik nysandardy múmkindiginshe jedel qalpyna keltirip, olardyń ári qaraı qalypty jumys isteýin qamtamasyz etý jóninde naqty tapsyrma berdi.
Qazirgi ýaqytta keltirilgen shyǵyn kólemin naqtylaý boıynsha komıssııalardyń jumysy jalǵasyp jatyr. Tabıǵı qubylys saldarynan qaza bolǵandar men zardap shekkender joq. Jaǵdaı qatań baqylaýda.
Aıta ketelik Ekibastuzda qatty burshaq pen daýyldan keıin tótenshe jaǵdaı rejımi jarııalanýy múmkin ekendigi týraly jazǵan edik.
