Pavlodar oblysynda 1 mln tonnadan astam mal azyǵy daıyndaldy
PAVLODAR. KAZINFORM - Bıyl óńir sharýalary bir jarym jyldyq qor, ıaǵnı 1 mln 823 myń tonna shóp daıyndaýdy maqsat etip otyr.
Qazirgi ýaqytta Pavlodar oblysynyń sharýalary 1 mln 105 myń tonna shóp daıyndap úlgerdi. Bul - bıyl shabylýy tıis mal azyǵynyń 60%-y.
- Óńirdegi sharýa qojalyqtary jospar boıynsha bir jarym jyldyq qor túzýi kerek. Josparǵa súıensek, ol 1 mln 823 myń tonna. Sharýalar jaıylymdar men jaıylmalardan 105,7 myń tonna shóp shaýyp úlgerdi. Shóp bıyl mol, shabyndyqqa paıdalanylatyn jaıylmalar keýip tur, - dep habarlady aýyl sharýashylyǵy basqarmasynyń bas mamany Zámzagúl Búrkitbaeva Kazinform tilshisine bergen suhbatynda.
Buǵan deıin qyrkúıekte Ertis ózeniniń tasý múmkindigi joǵary ekeni týraly jazǵanbyz.
Osyǵan baılanysty mamandar jaıylmada mal azyǵyn daıyndap jatqan sharýashylyqtar shabylǵan shópti bıikteý jerlerge tasyp alýy kerek dep keńes bergen.
Aýyl sharýashylyǵy basqarmasynyń ókilderi mal azyǵyn daıyndaý jospary 15 tamyzda tolyq oryndalady dep sendirdi. Sondyqtan mol shópti qystaqtarǵa jetkizý úshin sharýalarda ýaqyt jetkilikti dep esepteıdi. Qazirdiń ózinde Ertis boıyn jaılaǵan Jelezın, Aqqýly, Sharbaqty aýdandary negizgi kólemdi eńserýge jaqyn.
Eske sala keteıik, Ertis-Baıan óńirindegi shabyndyqtarda ár gektardan 8,9 tsentnerden aınalýda. Al kópjyldyq shópterdiń ónimdiligi gektaryna — 9 tsentner, jaıylmalar men kóltabandarda — 18,9 tsentnerge deıin jetip tur.
