Pavlodar oblysynda bir aıda kókónisterdiń baǵasy qalaı ózgerdi

PAVLODAR. KAZINFORM - Ertis-Baıan óńirinde sońǵy bir aı ishinde kartop, qyryqqabat, sábiz, sondaı-aq pııaz ben qııardyń baǵalary aıtarlyqtaı ózgergeni baıqaldy.

Ulttyq statıstıka bıýrosy Pavlodar oblysy boıynsha departamentiniń málimetinshe, qańtar aıynda pııazdyń quny 3,9% - ǵa tómendegen. Jańa jyldyq merekelerden keıin qııardyń baǵasy da túsip, 3,7% - ǵa arzandady.

Al kartoptyń baǵasy 8,6% - ǵa, qyryqqabat 8,1% - ǵa, sábiz 3,9% - ǵa, alma 1,8% - ǵa ósken.

- Azyq-túlik taýarlary tobynda taýyq jumyrtqasy 9,6% - ǵa, ósimdik maıy men sary maı 1,8% - ǵa, makaron ónimderi - 1,7% - ǵa, unnan jasalǵan kondıterlik ónimder - 0,9% - ǵa, balyq pen teńiz ónimderiniń baǵasy 0,1% - ǵa óskeni baıqaldy. Alkogoldi ishimdikter men temeki ónimderiniń baǵasy 0,8% - ǵa ósti, - dep habarlady departamentten.

Azyq-túlik emes taýarlar boıynsha aıtar bolsaq, benzınniń quny 3,8% - ǵa, turmystyq aspaptar 2,8% - ǵa ósken. Aqyly qyzmetter salasynda uıaly baılanys 8,7% - ǵa, jolaýshylar kóligi qyzmeti 2% - ǵa qymbattaǵan.

Buǵan deıin Qazaqstanda jylqy etiniń baǵasy qansha turatynyn jazǵanbyz.