Pavlodar oblysynda bir aıda azyq-túlik baǵasy qalaı ózgerdi
PAVLODAR. KAZINFORM - Sońǵy bir aı ishinde Pavlodar óńirinde jumyrtqa, jarma, qııar jáne qyzanaq baǵasy óskeni baıqaldy. Sonymen qatar keıbir kókónisterdiń baǵasy arzandaǵan.
Oblystyq Ulttyq statıstıka bıýrosy departamentiniń málimetinshe, qyrkúıek aıynda óńirde jumyrtqa baǵasy 8,8%-ǵa ósken. Sondaı-aq jarma men dándi daqyldar 0,9%-ǵa, nan-toqash jáne unnan jasalǵan kondıterlik ónimder 0,7%-ǵa, maılar men tońmaılar 0,3%-ǵa qymbattaǵan.
Kókónister arasynda eń joǵary ósim qııar men qyzanaqta tirkeldi. Qııar baǵasy bir aıda 17,3%-ǵa, qyzanaq 15,9%-ǵa ósken.
- Sonymen qatar keıbir ónimderdiń baǵasy tómendegen. Qant 6,6%-ǵa, alkogolsiz sýsyndar 2,2%-ǵa arzandaǵan. Kókónisterdiń ishinde pııazdyń baǵasy 31,3%-ǵa, kartop 25,4%-ǵa, sábiz 19,5%-ǵa, qyryqqabat 13,1%-ǵa tómendegen. Sondaı-aq alma 1,3%-ǵa, almurt 0,9%-ǵa arzandaǵan, - dep habarlady departamentte.
Azyq-túlik emes taýarlar arasynda farmatsevtıkalyq ónimder 2%-ǵa, janar-jaǵarmaı materıaldary 1,5%-ǵa, jýǵysh jáne tazalaǵysh quraldar 0,5%-ǵa qymbattaǵan.
Qyzmet kórsetý salasynda sýyq sý tarıfi 11,6%-ǵa, sý burý qyzmetteri 3,2%-ǵa, bilim berý qyzmetteri 1,7%-ǵa ósken.
Eske sala keteıik, elde azyq-túlik baǵasy ekinshi aı qatarynan tómendedi.
