Pavlodar oblysynda bıyl qyrylǵan kıikterdiń sany úsh ese kóp

Áleýmettik jelide Pavlodar oblysynyń Abaı oblysymen shektesetin tusynda júzdegen kıiktiń ólekseleri jatqany týraly vıdeo tarady.

Vıdeony túsirýshi adamnyń sózinshe, janýarlardyń óleksesi kóp ýaqyttan beri jatyp qalǵany baıqalady. Bul tabıǵı úderis bolýy múmkin dep boljaıdy avtor.

Kazinform tilshisi kıikterdiń neden qyrylǵanyn anyqtap kórdi.

Orman sharýashylyǵy jáne janýarlar dúnıesi komıtetiniń Pavlodar oblystyq aýmaqtyq ınspektsııasynyń bólim basshysy Arman Muqataevtyń aıtýynsha, bul tabıǵı rettelýdiń kórinisi.

- Sońǵy jyldary aımaǵymyzda kıik sanynyń turaqty túrde kóbeıýi baıqalyp otyr. Jeltoqsan aıynyń ortasynan bastap kıikterde shaǵylysý kezeńi ótedi. Atalyqtyń jasy neǵurlym úlken bolsa, onyń shaǵylysatyn urǵashy eshkileriniń sany soǵurlym kóp bolady.

Soǵan baılanysty tekesi kóp energııa jumsap, «kúıip ketýi» múmkin. Olardyń deni keıin ólip qalady. Bul jas atalyqtardyń ósip-ónýine jaǵdaı týdyratyn tabıǵı úrdis. Baıanaýyl jáne Maı aýdandarynyń dalaly jerlerinen jınalyp jatqan ólekseler sol qysta qyrylǵan atalyq kıikterge tıesili, - dep túsindirdi maman.

Ǵalymdardyń tujyrymy boıynsha jyl saıyn kıikterdiń shamamen 10 paıyzy tabıǵı túrde ólip, kıik tabyndarynyń sany rettelip otyrady. Byltyr Pavlodar oblysy aýmaǵynan shamamen 200-den astam kıik ólekseleri tabylsa, bıyl 664 ólekse anyqtalǵan. 

- Kıik sanynyń artýyna baılanysty jabaıy janýarlardyń qyrylý úderisi de joǵary bolatyny málim. Oblysta kıik sany molaıa túskenin eskersek, tabıǵı túrde ólgenderiniń qatary da arta beretini túsinikti. Ólekseler jergilikti ákimdikterdiń kúshimen jınalyp, mal qorymdaryndaǵy arnaıy qazylǵan shuńqyrlarda órtelip joıylady. Bıyl aqpan, naýryz aılarynan bastap jınala bastady. Bizdiń mekeme men «Ohotzooprom» uıymy atalǵan jumystardy baqylaıdy, - dep qosty ınspektsııa ókili.

Eske sala keteıik, el aýmaǵynda 17 myńnan astam kıik óleksesi joıyldy.