Pavlodar oblysynda balyq ınspektorlary jetispeıdi

PAVLODAR. KAZINFORM — Ertis-Baıan óńirinde búginnen bastap balyqtyń kez kelgen túrin aýlaýǵa tyıym salyndy. Deıturǵanmen memlekettik ınspektorlardyń azdyǵy barlyq sý aıdynyn bir mezette baqylaýǵa múmkindik bermeıdi.

Pavlodar oblysynyń aýmaǵynda balyq resýrstaryn qorǵaý, ósimin molaıtý jáne paıdalaný salasyndaǵy memlekettik baqylaý men qadaǵalaýdy «Zaısan-Ertis oblysaralyq basseındik balyq sharýashylyǵy ınspektsııasy» RMM-niń óńirlik balyq ınspektsııasy bólimi júzege asyrady. 

— Pavlodar oblysy boıynsha balyq ınspektsııasy bóliminde jalpy sany 8 memlekettik ınspektor bar. Munshama qyzmetker sany oblystaǵy sý aıdyndaryn tolyqtaı baqylaýǵa alýǵa jetkiliksiz ekeni ras. Bir ınspektorǵa shamamen 2-3 baqylaý aýdany tıesili. Bul jaǵdaı memlekettik ınspektorǵa belgili bir kólemde júkteme túsirip otyr, — dep habarlady Kazinform tilshisine «Zaısan-Ertis oblysaralyq basseındik balyq sharýashylyǵy ınspektsııasy» RMM-niń Pavlodar balyq ınspektsııasynan.

Inspektsııa mamandarynda 6 avtokólik, 1 qyzmettik kater, qýaty 60 at kúshine ıe aspaly motory bar 1 patrýldik kater, motorly 1 úrlemeli qaıyq jáne 1 kvadrokopter (dron) bar.

— Ýákiletti organnyń vedomstvosymen materıaldyq-tehnıkalyq jaǵdaıdy jaqsartý maqsatynda tıistý jumystar júrgizilip jatyr, — dep atap ótti ınspektsııadan.

Oblys aýmaǵynda kólemi 72 myń gektardan asatyn Ertis ózeni, 14,5 myń gektardy quraıtyn Q.Sátbaev atyndaǵy kanal bar. Odan bólek óńir aýmaǵynda 120 sý aıdyny ornalasqan. Olardyń barlyǵynda tıisti kezeńderde balyq aýlaýǵa bolady.

Buǵan deıin Pavlodar oblysynyń dalaly jerlerindegi tuşy sý aıdyndarynda, Ertis ózeninde jáne onyń jaıylmaly sý aıdyndarynda 15 sáýir — 30 mamyr aralyǵynda balyqtyń kez kelgen túrin aýlaýǵa ýaqytsha tyıym salynatynyn jazǵanbyz.