Pavlodar oblysynda balalary órtten qaza tapqan otbasyǵa páter berildi

ASTANA. KAZINFORM — Órtten eki balasy qaza tapqan otbasyǵa Irtyshsk aýylynda úsh bólmeli páter berildi, dep habarlaıdy Kazinform tilshisi. 

Ertis aýdanynyń ákimdigi otbasynyń jaqyndaryna kóńil aıtty. Qazirgi ýaqytta zardap shekkendermen psıholog mamandar jumys istep jatyr, órttiń sebebi áli anyqtalý ústinde.

Qutqarylǵan balalardyń biriniń jaǵdaıy óte aýyr.

— Órtten zardap shekken otbasyǵa úsh bólmeli jaıly páter usynylyp otyr, qajetti jıhaz, kıim-keshek jáne turmystyq zattar satyp alyndy. Sondaı-aq, jerleý rásimin uıymdastyrýǵa kómek kórsetiledi, — dep habarlady Ertis aýdanynyń ákimdigi.

Eske sala ketsek, 15 qańtarda oblystyq tótenshe jaǵdaılar departamenti Irtyshsk aýylyndaǵy jeke úıde órt shyqqanyn habarlady. 

Órt kezinde kámeletke tolmaǵan tórt bala úıde jalǵyz qalǵan, olardyń anasy jumysta bolǵan. Balalardyń ekeýi qaza tapty. 

Keıinirek dárigerler zardap shekken balalardyń jaǵdaıy qalaı ekenin baıandap berdi.