Pavlodar oblysynda balalardyń qatysýmen bolatyn jol apattary jıilegen
PAVLODAR. KAZINFORM - Jyl basynan beri aımaqta balalardyń qatysýymen 187 jol-kólik apaty tirkelip, 6 bala qaza tapqan.
Quqyqtyq statıstıka jáne arnaıy esepke alý departamentiniń málimetinshe, jyl basynan beri Pavlodar oblysynda barlyǵy 585 jol-kólik tirkelgen. Bul ótken jyldyń uqsas kezeńimen salystyrǵanda 24 jaǵdaıǵa az. Deıturǵanmen balalardyń qatysýymen bolǵan apattar kerisinshe 26 jaǵdaıǵa kóbeıip, 187-ge jetken.
- Saldarynan 6 bala qaza taýyp, taǵy 225 kámeletke tolmaǵan bala túrli jaraqat alǵan. Qaza tapqan alty balanyń úsheýi – kólik jolaýshysy, úsheýi – jaıaý júrginshi. Tórt jaǵdaı Pavlodar men Aqsý qalalarynda, al ekeýi oblystyq jáne respýblıkalyq mańyzy bar avtokólik joldarynda bolǵan, – deıdi quqyqtyq statıstıka jáne arnaıy esepke alý departamentiniń prokýrory Ásel Súleımenova.
Vedomstvo ókiliniń aıtýynsha, bul kórsetkishter profılaktıkalyq sharalardy tek bilim berý uıymdarynyń janynda ǵana emes, qala kóshelerinde, qala syrtyndaǵy joldarda jáne qozǵalysy qarqyndy baǵyttarda da kúsheıtý qajettigin kórsetedi. Sonymen qatar, qaıǵyly oqıǵalardyń birinde kámeletke tolmaǵan balany arnaıy ustaý qurylǵysynsyz (avtokreslosyz) tasymaldaý deregi anyqtalǵan. Qadaǵalaý organdary bul jaǵdaıdy kólikte bala qaýipsizdigin saqtaý talaptaryn kúsheıtý jónindegi mańyzdy belgi retinde qarastyryp otyr.
Prokýrorlar jaıaý júrginshi balalardyń qaýipsizdigin qamtamasyz etýde otbasy, mektep, jol qyzmetteri men júrgizýshilerdiń birlesken áreketi aýadaı qajet ekenin atap ótti.
Eske sala keteıik, Pavlodar óńirinde jol apatynan bir bala qaza taýyp, úsheýi zardap shekti.
