Pavlodar oblysynda aýsyl aýrýy tirkelgen joq

PAVLODAR. KAZINFORM — Óńirlik veterınarııa basqarmasy aýsyl aýrýy boıynsha aımaqtaǵy epızootııalyq jaǵdaı qolaıly ekenin habarlady. Derttiń aldyn alý úshin aýsylǵa qarsy 1 705 635 doza vaktsına jetkizilgen. 

Buǵan deıin oblystyń birqatar aýdanynda iri qara mal arasynda asa qaýipti juqpaly aýrýlarǵa uqsas klınıkalyq belgiler tirkelgen bolatyn. Turǵyndar túlikteri úshin alańdap, veterınarııa mamandaryna júgingen.

— Dıagnozdy naqtylaý maqsatynda janýarlardan bıologııalyq synamalar alynyp, olar Astana qalasyndaǵy Veterınarııa ulttyq referenttik ortalyǵyna jiberildi. Synamalar vezıkýlıarlyq stomatıt, IRT (ınfektsııalyq rınotraheıt), aýsyldyń qurylymdyq emes aqýyzy, vırýstyq dıareıa, blıýtang boıynsha zerthanalyq jaǵdaıda tekserildi. Zerthanalyq taldaý nátıjeleri boıynsha alynǵan barlyq synama teris nátıje kórsetti. Bul úı maldarynda aýsyl men ózge de asa qaýipti aýrýlardyń joq ekenin dáleldeıdi, — dep málimdedi Pavlodar oblystyq veterınarııa basqarmasynan.

2026 jylǵa bekitilgen josparǵa sáıkes profılaktıkalyq is-sharalardy júrgizý úshin aýsylǵa qarsy 1 705 635 doza vaktsına jetkizilgen.

Eske sala keteıik, Shyǵys Qazaqstanda aýsylǵa qarsy aýqymdy vaktsınatsııa bastaldy.