Pavlodar oblysynda asa iri kólemde esirtki taratý faktileri anyqtaldy

ASTANA. KAZINFORM – Pavlodar oblysy Jelezın aýdanynyń prokýratýrasy polıtsııamen birlesip, júrgizgen reıd barysynda aýyldyq okrýgterdiń birindegi jeke turǵyn úı aýmaǵynan shamamen 2 kg marıhýana tabyldy.

Bul týraly Pavlodar oblysy prokýratýrasynyń baspasóz qyzmetinen málim boldy.

Baspasóz qyzmetiniń málimetterine qaraǵanda, sot úkimimen kináli tulǵa Qylmystyq kodekstiń 296-babynyń 4-bóligi boıynsha qylmystyq jaýapqa tartylyp, oǵan 3 jyl merzimge bas bostandyǵynan aıyrý jazasy taǵaıyndaldy.

Taǵy bir jaǵdaıda, oblys prokýratýrasynyń úılestirýimen qylmystyq toptyń qyzmeti toqtatyldy. Olar kondıterlik kóknár satamyz degen jeleýmen onyń tuqymdary men keptirilgen kóknár sabanynan daıyndalǵan esirtki zattaryn taratýmen aınalysqan.

Uımdasqan to sondaı-aq azyq-túlik dámdeýishterin satatyn oryndar ashqan, negizgi maqsattary esirtkige táýeldi adamdarǵa kóknár qospasyn satý bolǵan.

Esirtki zattaryn taratý faktisi boıynsha Qylmystyq kodekstiń 297-babynyń 3-bóligi negizinde qylmystyq is qozǵaldy. Ekonomıkalyq tergep-tekserý departamenti bul baǵytta tergeý is-sharalaryn júrgizýde.

- Tergeý múddesine baılanysty Qylmystyq-protsestik kodekstiń 201-babyna sáıkes basqa aqparat jarııalaýǵa jatpady, - delingen habarlamada.

Osyǵan deıin Pavlodarda oqýshyǵa esirtki berip, zorlaǵan er adamǵa úkim shyqqany týraly jazdyq.