Pavlodar oblysynda alıment tólemeıtinderdi izdestirý jumystary kúsheıtildi
PAVLODAR. KAZINFORM - Qadaǵalaý qyzmeti shenberinde Pavlodar oblysynda izdestirýge jarııalanǵan jáne TOP-100 izdestirip jatqan boryshkerler» respýblıkalyq tizbesine engizilgen boryshkerlerdiń ornalasqan jerin anyqtaý boıynsha vedomstvoaralyq jumys toptary quryldy.
Bul týraly Pavlodar oblystyq prokýratýrasynyń baspasóz qyzmeti habarlady.
Búgingi tańda tizimdegi alty boryshkerdiń beseýiniń ornalasqan jeri anyqtaldy. Olardyń tórteýi ákimshilik jaýapqa tartylyp, bir boryshker alıment boıynsha bereshegin tolyq ótedi.
Máselen, 2023 jylǵy jeltoqsanda boryshkerlerdiń birine qatysty 9 mln teńge kóleminde alıment óndirý týraly atqarýshylyq is júrgizý qozǵalǵan. Sot oryndaýshysy májbúrlep óndirý sharalaryn qabyldaǵanymen, boryshkerdiń ornalasqan jerin anyqtaý múmkin bolmaǵan. Osyǵan baılanysty aǵymdaǵy jyldyń qańtar aıynda ol izdeýge jarııalanǵan.
- Oblys prokýratýrasy men sot oryndaýshylary júrgizgen birqatar is-shara nátıjesinde boryshkerdiń ornalasqan jeri anyqtalyp, onyń 9 mln teńge kólemindegi alıment boıynsha bereshegi tolyq kólemde óteldi, - delingen habarlamada.
Alıment boıynsha bereshekti óndirý jónindegi qabyldanǵan sharalardyń nátıjesinde birqatar boryshker ákimshilik jáne qylmystyq jaýapqa tartyldy.
Boryshkerlerdiń ornalasqan jerin anyqtaý jáne alıment óndirý jumystary jalǵasyp jatyr.
Osyǵan deıin Qyzylordada alıment óndirý boıynsha 500-den astam is tıisti baqylaýsyz qalǵany týraly jazdyq.
