Pavlodar oblysynda áleýmettik baǵdarlamaǵa bólingen 144 mln teńge qoldy bolǵan

PAVLODAR. KAZINFORM – Pavlodar oblysyndaǵy Ýspen aýdany sotynda «Qýatty óńirler – el damýynyń draıveri» memlekettik baǵdarlamasy aıasynda bólingen bıýdjet qarjysyn jymqyrý isi boıynsha qylmystyq is qaraldy.

Qylmystyq isti Ýspen aýdanynyń prokýratýrasy bastap, keıin Pavlodar oblysy boıynsha «Eńbek mobıldigi ortalyǵy» KMM qyzmeti tekserilgen. Tekserý nátıjesinde «Ýspen aýdany karerlik ortalyǵy» fılıalynyń mamandary baǵdarlamanyń qatysýshylaryn júıeli túrde aldaǵany belgili boldy.

- Atap aıtqanda, baǵdarlama boıynsha qonys aýdarýshylarǵa satyp alynǵan turǵyn úı qunynyń jartysyn óteý qarastyrylǵan, eń joǵary tólem – 4 mln teńge. Alaıda aıyptalýshylar qonys aýdarýshylarǵa úıdi naryqtan tómen baǵaǵa tabýdy mindettep, keıin satyp alý-satý kelisiminde áldeqaıda joǵary baǵany – 8 mln teńgeni kórsetken. Aıyptalýshylardyń nusqaýymen turǵyndar bul aıyrmashylyqty «Baǵdarlama sharttary aıasynda» degen jeleýmen qolma-qol berýge májbúr bolǵan, - dep jazdy Bas prokýratýradan.

Nátıjesinde bıýdjet qarjysyn zańsyz ıemdenýdiń jáne aınalymǵa túsirýdiń aıla-sharǵysy qurylǵan. Tergeý barysynda memleketke keltirilgen jalpy zalal 144 mln teńge ekeni anyqtaldy.

Memlekettik aıyptaýshy istiń aýyrlyǵyn jáne keltirilgen zalaldy eskere otyryp, sottan aıyptalýshylarǵa bas bostandyǵynan aıyrý túrindegi jaza taǵaıyndaýdy surady.

Sot úkimimen eki adam kináli dep tanyldy: bireýine – 5 jyl bas bostandyǵynan aıyrý jazasy, ekinshisine – 3 jyl bostandyǵyn shekteý jazasy kesildi.

Úkim áli zańdy kúshine engen joq.

Aıta keteıik, Pavlodar oblysynda prokýrorlar ınvestorǵa 18 mln teńge bereshekti óndirip alýǵa kómektesti.