Pavlodar oblysynda aǵaıyndy eki bala sýǵa batyp ketti

Oqıǵa Ýspen aýdany Galıtskoe aýylynda boldy. Aǵaıyndy jeti jáne segiz jasar ul balalar qaıtys boldy, dep habarlaıdy QazAqparat tilshisi.

Uldardyń anasy keshki saǵat toǵyzdyń shamasynda jumystan kelgende balalaryn úıinen tappaǵan.

Áıel ýchaskelik polıtsııa qyzmetkerine habarlasyp, aýyldastarynan joǵalǵan balalardy tabýǵa kómektesýin surady.

Joǵalǵan balalar saǵat 23.00-de tabyldy.

Ókinishke qaraı, olardy aman alyp qalý múmkin bolmady.

«5 qazan kúni saǵat 22:20 shamasynda Galıtskoe aýylynyń ýchaskelik ınspektoryna aýyl turǵyny habarlasyp, ol keshki saǵat 21:00-de jumystan úıine kelgende jeti jáne segiz jasar kishkentaı uldaryn tappaı qalǵanyn habarlady. Áıel balalardy tabýǵa kómek suraǵan. Ýchaskelik ınspektor aýyl turǵyndarymen birge izdestirý sharalaryn uıymdastyrdy» dep habarlady Pavlodar oblystyq polıtsııa departamentiniń baspasóz qyzmetinen.

Qaıtys bolǵan balalar aýyldan 500 metr jerden tabyldy. Olar alqap sýarýǵa arnalǵan jasandy sý qoımasyna batyp ketken.

«Balalardyń denelerinen zorlyq-zombylyq belgileri anyqtalǵan joq. Sot-medıtsınalyq saraptama taǵaıyndaldy, onyń qorytyndysy boıynsha protsessýaldyq sheshim qabyldanady», - dep túsindirdi polıtsııa departamentiniń baspasóz qyzmetinen.

Gıdrotehnıkalyq qurylystyń qorshalmaǵany, aýmaqta jaryq bolmaǵany, jaqyn mańda tyıym salatyn belgilerdiń jetkiliksizdigi anyqtaldy.

Bul adam ómirine qaýip tóndiredi, sondyqtan eki jáne odan da kóp adamnyń ólimine ákep soqtyrǵan qurylys jumystaryn júrgizý kezinde qaýipsizdik erejelerin buzý jáne qyzmettik mindetterin oryndaý kezinde salǵyrttyq tanytý faktileri boıynsha Qylmystyq kodekstiń 277-babynyń 3-bóligi jáne 254-baby boıynsha sotqa deıingi tergeý amaldary bastaldy.