Pavlodar oblysynda 76 myń adam tumaýǵa qarsy ekpe aldy
PAVLODAR. KAZINFORM - Bıyl óńir halqynyń 10,7 paıyzyn tumaýǵa qarsy vakıtsnamen qamtý josparlanyp otyr. Oblysta epıdemıologııalyq maýsymda tumaý jaǵdaılary tirkelgen joq.
Mamandardyń málimetinshe, oblysta 22 nozologııa boıynsha aýrýshańdyq deńgeıi tómendegen. Atap aıtqanda, jedel vırýstyq gepatıtter 55,5%-ǵa, jelsheshek 10%-ǵa, jedel ishek ınfektsııalary 11,6%-ǵa, al serozdy menıngıt 21,4%-ǵa azaıǵan.
– Aǵymdaǵy epıdemıologııalyq maýsymda tumaý jaǵdaılary tirkelgen joq. Tumaýdan basqa vırýstarǵa 177 zerthanalyq úlgi alynyp, onyń 28-inen oń nátıje anyqtaldy. Sonymen qatar COVID-19-ǵa zerttelgen 177 úlginiń segizi oń nátıje kórsetti, – deıdi oblystyq sanıtarııalyq-epıdemıologııalyq baqylaý departamentiniń basshysy Batyrbek Álıev.
Dárigerler tumaýdyń aldyn alýdyń, onyń asqynýy men ólim-jitimin azaıtýdyń tıimdi joly vaktsınatsııa ekenin eske salady. Qazirgi ýaqytta óńirde 76 myń adam ekpe alǵan. Jalpy, oblys turǵyndarynyń 10,7 paıyzyn tumaýǵa qarsy vaktsınamen qamtý kózdelgen.
Mamandar jedel respıratorlyq vırýstyq ınfektsııalar men tumaýdyń aldyn alý úshin qoldy sabynmen jıi jýyp, antıseptık qoldanýǵa keńes beredi. Sondaı-aq aýrý belgileri bar adamdarmen jaqyn qarym-qatynastan aýlaq bolyp, bólmelerdi jıi jeldetý jáne úı-jaılarda tazalyq saqtaý qajet.
Buǵan deıin vaktsına aýtızm týdyrady degen aqparattyń túbi qaıda jatqanyn jazǵanbyz.
